ارام پيعىل تانىتقان تاكسي جۇرگىزۋشىلەرى ەكسپو قوناقتارىن تەگىن تاسىمالدايدى
بارلىق ءبىرىڭعاي تاكسي قىزمەتتەرىندە اۋەجاي مەن ۆوكزالدان ەلوردا نىساندارىنا دەيىنگى ارالىقتا ساپاردىڭ شامامەن باعالانعان قۇنى كورسەتىلەتىن قازاق، ورىس جانە اعىلشىن تىلدەرىندە جازىلعان پاراقشالار بولاتىنىن استانا قالاسى اكىمىنىڭ ورىنباسارى ماليكا بەكتۇروۆا مەديا ورتالىققا حابارلاعان بولاتىن.
«جولاۋشىلار نازارىنا: ەگەر ءسىز ءبىرىڭعاي تاكسي قىزمەتتەرىمەن تاكسومەتردى قوسپاي جول جۇرسەڭىز، ءسىزدىڭ ساپارىڭىز تەگىن بولاتىنىن ايتقىم كەلەدى»- دەيدى م. بەكتۇروۆا.
سونداي-اق ول تاياۋدا ورىن العان ۆەنگر ازاماتىن استانانىڭ وڭ جاعالاۋىنا دەيىن 40 مىڭ تەڭگەگە جەتكىزگەن تاكسي جۇرگىزۋشىسىنىڭ وقيعاسىنا قاتىستى پىكىر ءبىلدىردى.
- بىرىنشىدەن، ول تاكسومەترى بولا تۇرا، ونى قوسپاعان. ەكىنشىدەن، تۋريست بارعىسى كەلگەن باعىتتىڭ ساپار باعاسى تاكسي قىزمەتىنىڭ نۇسقاۋلىعىندا كورسەتىلگەن. سايكەسىنشە، تاكسيست ساپار قۇنىن ادەيى كوتەرگەن. كولىك جۇرگىزۋشىسى ءوز كىناسىن تولىق مويىنداپ جانە وتەۋىن تولەپ، وكىنگەندىكتەن ءبىز ونى جاۋاپكەرشىلىككە تارتقان جوقپىز. الايدا، بۇل جاعداي وعان جانە ونىڭ ارىپتەستەرىنە ساباق بولادى دەگەن ويدامىن»، - دەپ بەكتۇروۆا ءوز ءسوزىن جالعاستىردى.
شەتەلدىكتەن قوماقتى قاراجات العان جۇرگىزۋشى ءبىرىڭعاي تاكسي قىزمەتىنە جاقىندا جۇمىسقا ورنالاسقانى بەلگىلى بولدى.
- بۇرىن ول جەكە تاكسي جۇرگىزۋشىسى بولعان، كەيىن قىزمەتىن زاڭداستىرعىسى كەلگەن. الايدا، اۋرۋ قالسا دا، ادەتتەرى ءالى قالماعان ەكەن، - دەپ ازىلدەدى بەكتۇروۆا.
ەكسپو-2017 حالىقارالىق مامانداندىرىلعان كورمەسى استانادا ءوز جۇمىسىن 10- ماۋسىمنان باستايدى.