الماتىدا «شىنجاڭ كينو اپتالىعى» وتەدى
شارانى «قازاق فيلم» ا ق، ق ح ر شىنجاڭ تيان-شان كينوستۋدياسى جانە ق ح ر شىنجاڭ فيلم تاراتۋ جانە كورسەتۋ كومپانياسى بىرلەسىپ اتقارماق.
«شىنجاڭ كينو اپتالىعى «2017 قازاقستانداعى قىتاي كينو فەستيۆالى» اياسىندا وتەتىن مادەني شارالارىنىڭ ءبىرى رەتىندە قىتاي جانە قازاقستان تاراپىنان جان-جاقتى قولداۋ تاۋىپ، قازاقستان مەن ق ح ر شىنجاڭ كينو سالاسىنداعى تاجىريبە الماسۋ مەن مادەني ىنتىماقتاستىعىنىڭ الاڭىنا اينالدى.
سونىمەن قاتار، مۇنىڭ قازاقستان كورەرمەندەرىنىڭ قىتايدى، ءتىپتى شىنجاڭ كينو ونەرىن جاقىنىراق تانۋىنا ايتارلىقتاي جاردەمى بولماق.
ەكى اپتاعا جالعاساتىن «شىنجاڭ كينو اپتالىعى» شەڭبەرىندە الماتى قالاسىنىڭ «كينوپارك»، «ارمان» ءتارىزدى 5 كينوتەاترىندا ءار الۋان تاقىرىپتاعى جانە قويۋ ۇلتتىق ەرەكشەلىككە يە كينو تۋىندىلار كورسەتىلەدى»، - دەيدى «مۇرات جولى» مادەنيەت قوعامدىق بىرلەستىگىنىڭ ءتوراعاسى دۋمان امان ۇلى.
ونىڭ ايتۋىنشا، «شىنجاڭ كينو اپتالىعى» اياسىندا وقيعالارى شىنايى ومىردەن الىنىپ، شەكسىز ماحابباتتى جىرلايتىن «شىنايى ماحاببات» فيلمى، اقىندىقتى اسقاق مۇرات تۇتقان قازاق قىزىنىڭ ايتىس ونەرىن ورگە سۇيرەر سۇلۋ جان-دۇنيەسى سۋرەتتەلگەن «گۇلبيكە» فيلمى، شىنجاڭ جاس وسپىرىمدەرىنىڭ جاستىق رۋحىن جىگەرلەندىرۋگە باعىتتالعان «ارمان اسۋى» فيلمى، جانە اقشا، ادامي قاسيەت، وتباسى، ماحاببات جانە دوستىق تاقىرىبىنداعى «اقشانىڭ الەگى» اتتى كومەديالىق فيلم سەكىلدى تىڭ تۋىندىلار كورەرمەندەر نازارىنا ۇسىنىلماق.
اۆتور: ريزابەك نۇسىپبەك ۇلى