قىتايلار وڭتۇستىكتەن شىعاتىن بالعا قىزىعۋشىلىق تانىتۋدا

 شىمكەنت. قازاقپارات - قىتايلىقتار وڭتۇستىكتەن شىعاتىن بالعا قىزىعۋشىلىق تانىتۋدا. اسپان استى ەلىنىڭ كاسىپكەرلەرى ماقتارالدىق بال دايىنداۋشىلارعا ءجۇز توننا ەكولوگيالىق تازا ونىمگە تاپسىرىس بەردى.

جەرگىلىكتى قوجالىق سول سۇرانىستى وتەۋ ءۇشىن جۇمىس جاساۋدا، دەپ حابارلايدى قازاقپارات ح ا ا ءتىلشىسى. اتاپ ايتقاندا، ماقتارال اۋدانىنداعى شارۋا ءتىللا قالداربەكوۆا «ىرىس» ميكرو كرەديتتىك ۇيىمىنان 4,5 ميلليون تەڭگە نەسيە الىپ، بال اراسىن باعاتىن ورىن دايىنداعان. مۇنداعى مامانداردىڭ سوزىنشە ارالاردىڭ ءبىر ۇياشىعىنان جىلىنا 40 ليتر بال الۋعا بولادى. قوجالىق بۇگىندە مۇنداعى 300 ۇياشىقتان جىلىنا 15 تونناعا جۋىق بال الۋدا ەكەن. «ارالار سۋىققا توزبەيدى. ءبىزدىڭ اۋداننىڭ اۋا- رايى باسقا ايماقتارعا قاراعاندا الدەقايدا جىلى ءارى مۇنداعى جاۋىن- شاشىننىڭ از بولۋى - بال ارانى باعۋعا وتە قولايلى. سونداي- اق، كەرمەك، جانتاق، جىڭعىل، ماقتانىڭ گۇلىنەن ارالار ءنار الادى. ونداي وسىمدىكتەر مۇندا وتە كوپ» ، - دەيدى مارات مۇراتوۆ.

شارۋا قوجالىعى ماماندارى بال ارانىڭ ونىمىنە دەگەن سۇرانىس وتە جوعارى ەكەنىن ايتادى. دايىن ءونىمدى ماقتارالدىڭ مەكتەپتەرى مەن بالاباقشالارى- اق تولىقتاي ساتىپ الادى ەكەن. ءونىمنىڭ ءليترى -  1000 تەڭگە تۇرادى. سونداي- اق، «تەحاس بالى» قاۋىمداستىعى دا وسى شارۋاشىلىقتىڭ بالىن ءجيى ساتىپ الادى. «ءبىر ۇيادا ءبىر انالىق ارا، بىرنەشە ءجۇز اتالىق ارا جانە 100 مىڭعا دەيىن جۇمىسشى ارا بولادى. ۇرعاشى ارا ۇيادا ۇرپاق وسىرەدى. ول ارالاردىڭ ىشىندەگى ەڭ ءىرىسى، جىل ماۋسىمىنا قاراي دەنەسىنىڭ ۇزىندىعى 20-25 مم، ال سالماعى 150-300 م گ- گە جەتەدى. تاۋلىگىنە 2-3 مىڭ، ماۋسىمىنا 200 مىڭعا جۋىق ۇرىقتاندىرىلعان جۇمىرتقا سالادى. ۇرىقتانعان جۇمىرتقادان ۇرعاشى، جۇمىسشى جانە انالىق ارالار، ال ۇرىقتاندىرىلماعان جۇمىرتقادان تەك ەركەك ارالار شىعادى» - دەيدى مارات مۇراتوۆ.

 اۆتور: اينۇر اقبايەۆا