قازاقستان مەن قىتاي باستامالارى ۇلى جىبەك جولىنىڭ جاندانۋىنا سەپتىگىن تيگىزەدى - نازاربايەۆ

فوتو: None
  بەيجىڭ- استانا. قازاقپارات - قازاقستان پرەزيدەنتى نۇرسۇلتان نازاربايەۆ پەن ق ح ر ءتوراعاسى شي جينپيڭ «كورىكتى قازاقستان - كوركەم قىتاي: «نۇرلى جول» مەن «جىبەك جولى» ەكونوميكالىق بەلدەۋىن تۇيىندەستىرۋ» فوتوالبومىنىڭ باسىلىپ شىعۋىنا وراي جازباشا قۇتتىقتاۋلار جولدادى،

 دەپ حابارلادى قازاقپاراتتىڭ قىتايداعى مەنشىكتى ءتىلشىسى سادىق اكەجانوۆ.

 نۇرسۇلتان نازاربايەۆتىڭ قۇتتىقتاۋ حاتىندا قىتايدىڭ «جىبەك جولى ەكونوميكالىق بەلدەۋى» قۇرۋ باستاماسى مەن قازاقستاندا جۇزەگە اسىرىلىپ جاتقان «نۇرلى جول» مەملەكەتتىك باعدارلاماسى ۇلى ەۋرازيا ترانس قۇرلىقتىق ماگيسترالىنىڭ - جىبەك جولىنىڭ جاندانۋىنا سەپتىگىن تيگىزەتىندىگى ايتىلعان.

 «وسى جىلعى قازاقستانداعى قىتايدىڭ تۋريزم جىلى ءبىزدىڭ دوستاس ەلدەرىمىزدىڭ حالىقتارىن ودان ارى جاقىنداتا تۇسەتىندىگى ءسوزسىز»، - دەپ اتاپ وتەدى قازاقستان پرەزيدەنتى.

 ال شي جينپيڭ الداعى ۋاقىتتا ۇلى جىبەك جولىنىڭ ماڭىزدى ەلدەرىنە اينالاتىن قازاقستان مەن قىتاي وركەنيەتتەر اراسىنداعى الىس- بەرىسكە ايتارلىق زور ۇلەس قوساتىندىعىن باسا اتاپ وتكەن.

«ق ح ر مەن قازاقستان اراسىندا ديپلوماتيالىق بايلانىس ورناعاننان كەيىنگى 25 جىلدا مەملەكەتتىك قارىم- قاتىناس قارقىندى دامۋعا يە بولدى. ەكى ەل دە جوعارى دەڭگەيدەگى تىعىز بايلانىستاردى قولداپ، ساياسي ءوزارا سەنىمدى ۇنەمى نىعايتىپ، تاجىريبەلىك ىنتىماقتاستىقتى جان- جاقتى ىلگەرىلەتىپ وتىردى (...). قىتايلىق- قازاقستاندىق جالپى قامتىمدى ستراتەگيالىق سەرىكتەستىك دامۋدىڭ مۇنان دا جوعارى دەڭگەيىنە كوتەرىلىپ كەلەدى»، - دەپ جازدى قىتاي باسشىسى.

ونىڭ ايتۋىنشا، قىتاي مەن قازاقستان بىرلەسىپ شىعارعان بۇل فوتوالبوم بۇكىل الەمگە ەكى ەلدىڭ عاجايىپ تابيعي جانە مادەني نىساندارىن پاش ەتەدى جانە ەكى مەملەكەت حالىقتارى اراسىنداعى دوستىقتىڭ ىسكە اسىرىلۋىن كورسەتەدى. ەستەرىڭىزگە سالا كەتسەك، كەشە استانادا بەيبىتشلىك جانە كەلىسىم سارايىندا «كورىكتى قازاقستان - كوركەم قىتاي» فوتو كورمەسى اشىلدى. مادەني شارا قازاقستان مەن قىتايدىڭ اراسىنداعى ديپلوماتيالىق قارىم- قاتىناستىڭ 25 جىلدىعىنا ارنالعان. كورمەنى ق ر اقپارات جانە كوممۋنيكاتسيالار مينيسترلىگى، ق ح ر مەملەكەتتىك كەڭەسى باسپا ءسوز كەڭسەسى، ق ح ر- داعى قازاقستان ەلشىلىگى، قازاقستانداعى ق ح ر ەلشىلىگى، ق ح ر ادەبي تۋىندىلاردىڭ شەت تىلدەرىندە باسىلۋى جانە تارالۋى جونىندەگى باسقارماسى بىرلەسىپ ۇيىمداستىرعان. فوتو كورمەنىڭ اتقارۋشى ورگانى - «قازاقپارات» ح ا ا مەن قىتايدىڭ «جەنمين حۋاباو» جۋرنالى. شارا 10 - ماۋسىمعا دەيىن جالعاسادى.

اۋدارما: مارلان جيەمباي