ەرەجەسىز جەكپە-جەك چەمپيونى اكتريسانى زورلاعانى ءۇشىن ءومىر بويىنا سوتتالدى

استانا. قازاقپارات - UFC ليگاسىنىڭ بۇرىنعى قاتىسۋشىسى، سپورتشى دجوناتان كوپپەنحەيۆەر ادام ۇرلاۋ، جىنىستىق زورلىق جانە ۇرۋ ارەكەتتەرى ءۇشىن ءومىر بويىنا باس بوستاندىعىنان ايىرىلدى.

2014-جىلى كوپپەنحەيۆەر ءوزىنىڭ بۇرىنعى قىزى، پورنواكتريسا كريستي ماك پەن ونىڭ سۇيىكتىسى كوري توماسقا شابۋىل جاساعان بولاتىن. ماك بىرنەشە اۋىر جاراقات العان. ال توماستىڭ مۇرىنى سىنىپ، يىعى جارالانعان. سونداي-اق، سپورتشى سەكسۋالدىق زورلىق جاسادى دەپ تە ايىپتالعان.

ناۋرىز ايىنىڭ باسىندا لاس-ۆەگاستاعى القا بيلەر سوتى كوپپەنحەيۆەردى 29 زاڭ بۇزۋشىلىق بويىنشا كىنالى دەپ تانىدى. 35 جاستاعى سپورتشى شارتتى تۇردە مەرزىمىنەن بۇرىن بوستاندىققا تەك 71 جاسقا تولعان كەزدە عانا شىعا الادى.