اقتوبە اكىمدىگى مۇستافا شوقايدىڭ سۋرەتىن نەگە ءوشىرتتى؟
اقتوبەدەگى 5 قاباتتى تۇرعىن ءۇيدىڭ قابىرعاسىنا مۇستافا شوقايدىڭ پورترەتى سالىنىپ، ەل وسكەلەڭ ۇرپاققا تاربيە بەرەتىن باستاماعا قۋانعان ەدى.
ءبىراق بۇل قۋانىش كوپكە بارماي، سۋ سەپكەندەي باسىلدى. الەۋمەتتىك جەلىدە ارمان سقابىل ۇلى «الاشتىڭ ارىسى اقتوبەگە بوتەن بە ەدى؟» دەگەن تاقىرىپتا ءوز ويىن قالدىرعان.
«اقتوبەدە جاڭا كوشەگە الاشتىڭ ارىسى مۇستافا شوقايدىڭ اتى بەرىلىپ، جاڭا تۇرعىن ءۇيدىڭ قابىرعاسىنا سۋرەتى قاشالادى دەگەنگە تۇرعىندار كادىمگىدەي مارقايىپ قالعان. كەشە الەۋمەتتىك جەلىلەردىڭ بىرىنەن مىنا سۋرەتتى كورىپ، توبەمنەن بىرەۋ سۋ قۇيىپ جىبەرگەندەي بولدىم. مۇستافا بابامنىڭ ءاپ-ادەمى بەينەسىن اكىم-قارالاردىڭ ءبىرىنىڭ بۇيرىعىمەن قايتا بوياپ، كوزدەن بۇلبۇل ۇشىرعان»، - دەپ جازىپ، كەيىن وبلىس اكىمى بەردىبەك ساپاربايەۆتان، جالپى اقتوبەلىك شەنەۋنىكتەردەن جاۋاپ كۇتىپ وتىرعانىن جەتكىزگەن.
قۇرىلىس باسىنداعىلار دا بۇل شەشىمگە تۇسىنە الماي وتىر. «باتىس-2 اۋدانىنداعى كوشەگە مۇستافا شوقايدىڭ اتى بەرىلەدى، سۋرەتىن سالۋ كەرەك دەپ اكىمدىك تاپسىرما بەردى. ال دەمالىستا سۋرەتتى ءوشىرتتى. ءبىز دە بىلمەي قالدىق. نەگە ەكەنىن سۇراعانىمدا قۇرىلىس باسىنداعىلار سەبەبىن بىلمەدى. باسشىمىزعا حابارلاسىپ ەدىم، ءوشىرىپ تاستاۋعا تاپسىرما بەرگەنىن ايتتى. نەگىزى بۇعان دەيىن ول جەردە تۇرعىن ءۇيدىڭ جارناماسى بولدى. بىزگە جارناما باننەرىن الىپ تاستاپ، مۇستافا شوقاي كوشەسىنە ارناپ، ونىڭ پورترەتىن سالۋدى تاپسىردى. ادام ىزدەپ، سۋرەتشىنى العا اۋدانىنان تاپتىق. سۋرەت سالۋ جۇمىستارىنا بارلىعى ءتورت كۇن كەتتى. كەيىن اكىمدىكتىڭ ادامدارى كورىپ، «جاقسى ەكەن، سۋرەتشىنىڭ بايلانىس تەلەفونىن بەرىڭىزشى» دەپ سۇراپ تا الدى. ءبىز دە قۋانىپ قالدىق. سۋرەتشى الدىمەن قابىرعانى بوياپ، كەيىن سۋرەت سالۋدى باستادى. وتە مۇقيات جۇمىس ىستەدى. ءبىراق قازىر تۇسىنبەي وتىرمىز. بىزگە تەز سال دەپ تە ماجبۇرلەدى. ءتىپتى تاپسىرۋ اكتىسىن بەرگەن كەزدە قول قويماي، پورترەت بولعان كەزدە عانا رۇقسات بەرەمىز دەدى. ءبىز سالدىق، اكىمدىك تۇرعىن ءۇيدى تاپسىرۋعا رۇقسات بەردى. ال قازىر مىناداي جاعدايعا تاپ بولدىق»، - دەدى «CB Projoct» ج ش س باس ينجەنەرى گيناتۋللا ەرمەكوۆ.
بۇل ماسەلەنىڭ ءمان-جايى تۋرالى قالالىق ساۋلەت جانە قالا قۇرىلىسى ءبولىمى باسشىسىنىڭ ورىنباسارى ەركىن وردابايەۆ تۇسىنىكتەمە بەردى.
«سۋرەتشى پورترەتتى دۇرىس سالماعان. كەيىن ونى قالپىنا كەلتىرۋگە تىرىسقان ەكەن، ءبىراق بوياۋى دۇرىس بولماعان ەكەن. جاڭبىرعا شىدامادى، پورترەت ءبۇلىندى. ءبىر جاعىنان، مۇستافا شوقايدىڭ باسقا دا سۋرەتتەرىن سالۋعا بولادى عوي. سالىنىپ جاتقان ۇيلەر كوپ. بارلىق ۇيگە قازاقتىڭ باتىرلارىن سالۋعا بولادى. ەندى ول جەرگە مۇستافا شوقايدىڭ سۋرەتى سالىنبايدى. بالكىم باسقا ءبىر اقىننىڭ، قازاقتىڭ باتىرىنىڭ سۋرەتى سالىنۋى مۇمكىن. تاعى ءبىر ايتا كەتەتىن جايت، سۋرەت سالماس بۇرىن قۇرىلىس كومپانياسى قالالىق اكىمدىكتەن رۇقسات الۋى كەرەك ەدى. ءبىراق ولار بىزبەن كەلىسپەي، ءوز بەتتەرىمەن شەشىم قابىلداعان»، - دەدى ەركىن وردابايەۆ.
اۆتور: التىناي ساعىندىقوۆا