بيزنەسمەندەرگە كومەك قولىن سوزعان اكىمدەرگە سىيلىق تاعايىندالماق
16:33, 06 - ماۋسىم 2017
استانا. قازاقپارات - ءوز وڭىرلەرىندە قازاقستاندىقتارعا بيزنەس جۇرگىزۋدىڭ جەڭىل جاعدايلارىن جاساعان اكىمدەرگە جىل سوڭىندا ارنايى سىيلىق تاعايىندالادى، دەپ حابارلايدى قازاقپارات.
بۇل تۋرالى بۇگىن ق ر ۇلتتىق ەكونوميكا ۆيتسە-ءمينيسترى سەرىك جۇمانعارين ءمالىم ەتتى.
«جىل سوڭىندا ءبىز قالا مەن ايماقتاردىڭ بيزنەس جۇرگىزۋ جەڭىلدىگى بويىنشا رەيتينگىسىن جاسايمىز. ارنايى سىيلىقتار تاعايىندالادى. سىيلىقتار مەملەكەت باسشىسىنىڭ قاتىسۋىمەن بەرىلەدى. ۇزاق مەرزىمدى جۇمىسقا دايىندالۋ كەرەك»، - دەدى ۆيتسە-مينيستر دۇنيەجۇزىلىك بانك توبىنىڭ «قازاقستاندا بيزنەس جۇرگىزۋدىڭ سۋب-ۇلتتىق رەيتينگىسى-2017» اتتى ەسەبىن تانىستىرۋ شاراسىندا.
جۇمانعاريننىڭ ايتۋىنشا، اتالمىش سىيلىقتى تاعايىنداۋ بارىسىندا دۇنيەجۇزىلىك بانكتىڭ بيزنەس جۇرگىزۋدىڭ سۋب-ۇلتتىق رەيتينگىسى ەسكەرىلەتىن بولادى.
اۆتور: جاسۇلان جولدىبايەۆ