ق ر س ءى م جاۋاپتى حاتشىسى: بالالارىم شەتەلدە قازاق ەكەنىن ۇمىتا باستادى

استانا. قازاقپارات - قازاقستان ديپلوماتتارى شەتەلدە بەس جىلدان ارتىق جۇمىس ىستەمەيدى. بۇل تۋرالى سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا ءمالىم بولدى، دەپ حابارلايدى قازاقپارات.

 «ەلشىلەردىڭ شەتەلدە بولۋ مەرزىمىن 5 جىلدان ارتتىرماۋ ماسەلەسى وزەكتى بولىپ وتىر، سەبەبى قازىرگى كەزدە 20 جىلدان استام ۋاقىت بويى ەلگە ورالماعان ەلشىلەر، ديپلوماتتار بار. ولار ەلدەن قارىم- قاتىناسىن ۇزگەن دەپ ايتۋعا بولمايدى، دەگەنمەن دە سونى ناشارلاتقان، ەلدەگى جاعدايدى تەرەڭ تۇسىنبەيدى. ولاردى بەس جىل كولەمىندە ەلگە قايتارىپ، ءارتۇرلى دەڭگەيدە جۇمىس بەرىپ، سودان كەيىن قايتادان ديپلوماتيالىق سالاداعى قىزمەتكە باعىتتاۋ تۋرالى ۇسىنىستار بولىپ جاتىر. سوندىقتان بۇل زاڭ جوباسى جالپى ديپلوماتيالىق جۇمىستىڭ دارەجەسىن، ونىڭ تيىمدىلىگىن ارتتىرۋعا ۇلكەن اسەرىن بەرەدى دەگەن ويدامىز»، - دەدى يكرام ادىربەكوۆ «قازاقستان رەسپۋبليكاسىنىڭ ديپلوماتيالىق قىزمەتى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا.

 ءوز كەزەگىندە ق ر سىرتقى ىستەر مينيسترلىگىنىڭ جاۋاپتى حاتشى اناربەك قاراشيەۆ ديپلوماتتار ەلگە ءتيىستى مەرزىمدە ەلگە قايتىپ ورالعانى دۇرىس ەكەنىن اتاپ ءوتتى.

«بالالار قازاق ەكەنىن بىلمەي كەتەدى. مەن 12 جىل بولعان جوقپىن. بالالارىمدا تۋعان ەلى تۋرالى دۇرىس تانىمى بولمادى. ەلگە كەلىپ، ءۇش جىلدان كەيىن بالالار قازاق ەكەندەرىن سەزىپ وتىر، ياعني وسىندا مەكتەپكە بارىپ، قازاقشا سويلەپ، قاي مەملەكەتتىڭ بالاسى ەكەنىن تۇسىنە باستادى. سوندىقتان ديپلوماتتار ۇزدىكسىز شەتەلدە قىزمەت ەتە بەرسە، ولاردىڭ بالالارى قازاقستان جايىندا تەك ب ا ق ارقىلى عانا ءبىلىپ جۇرەدى»، - دەپ اتاپ ءوتتى ا. قاراشيەۆ.

اۆتور: رۋسلان عابباسوۆ