ەلباسى تيمۋر قۇلىبايەۆتى قابىلدادى

استانا. قازاقپارات - ەلباسى «اتامەكەن» ۇلتتىق كاسىپكەرلەر پالاتاسى پرەزيديۋمىنىڭ ءتوراعاسى تيمۋر قۇلىبايەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

كەزدەسۋ بارىسىندا مەملەكەت باسشىسىنا «اتامەكەن» ۇلتتىق كاسىپكەرلەر پالاتاسىنىڭ قازىرگى قىزمەتى جونىندە مالىمەت بەرىلدى.

نۇرسۇلتان نازاربايەۆ شاعىن جانە ورتا بيزنەستى قولداۋدىڭ ماڭىزدىلىعىنا توقتالىپ، بۇل باعىت بويىنشا مەملەكەت قابىلداعان شارالاردىڭ ناتيجەلەرىن اتاپ ءوتتى.

«سوڭعى كەزدە ءبىز قۇقىق قورعاۋ جانە جەرگىلىكتى ورگاندار تاراپىنان شاعىن جانە ورتا بيزنەستى قولداۋعا ارنالعان كوپتەگەن ماڭىزدى شەشىمدەر قابىلدادىق. مۇنىڭ ىشىندە شاعىن نەسيە بەرۋ ماسەلەسى دە، جۇرتتى بيزنەسكە ۇيرەتۋ ماسەلەسى دە بار»، - دەدى قازاقستان پرەزيدەنتى.

مەملەكەت باسشىسى «اتامەكەن» ۇلتتىق كاسىپكەرلەر پالاتاسىنىڭ ايماقتارداعى ءىس-قيمىلىمەن، ونىڭ ىشىندە جۇرتشىلىققا بيزنەس جۇرگىزۋ نەگىزدەرىن ۇيرەتۋ سالاسىنداعى جۇمىستارىمەن تانىستى.

«ءبىز وتكەن جىلى «باستاۋ» باعدارلاماسىن باستادىق. بۇل - 30 كۇن ىشىندە الدىن-الا ىرىكتەۋ وتكىزىپ، جۇرتقا بيزنەستىڭ الىپپەسىن ۇعىنۋعا مۇمكىندىك بەرەتىن ايلىق وقۋ كۋرسى. اكىمدىكتەرمەن بىرلەسىپ، شاعىن قارجى ۇيىمدارىن قۇرىپ، بىتىرۋشىلەردى قارجىلاندىردىق. ءبىز بۇل باعدارلامانى ۇكىمەتكە ۇسىندىق جانە قولداۋعا يە بولدىق. بيىلعى جىلى 1 ميلليارد 200 ميلليون تەڭگە ءبولىندى. باعدارلاما اياسىندا ەلىمىزدىڭ 80 اۋدانىندا جۇمىس جۇرگىزىپ، 15 مىڭ ادامدى وقىتاتىن بولامىز»، - دەدى ت. قۇلىبايەۆ.