شاڭحاي ىنتىماقتاستىق ۇيىمى سامميتى اياسىندا ءۇندىستان مەن پاكىستاندى ۇيىمعا تولىققاندى مۇشە ەتىپ قابىلداۋ جوسپارلانىپ وتىر
دەپ مالىمدەدى بەيجىڭدە وتكەن كەزەكتى باسپا ءسوز ءماسليحاتىندا ق ح ر ءس ءى م- ءنىڭ رەسمي وكىلى حۋا چۋنين.
ءۇندىستان مەن پاكىستاندى ۇيىمعا رەسمي مۇشە رەتىندە قابىلداۋدىڭ ەكى ەل قارىم- قاتىناسىنا اسەرى تۋرالى تىلشىلەردىڭ ساۋالىنا ق ح ر س ءى م- ءنىڭ رەسمي وكىلى:
«ش ى ۇ- نىڭ مۇشەلىگىن كەڭەيتۋ - ۇيىمعا مۇشە مەملەكەتتەردىڭ قابىلداعان ورتاق شەشىمى. 2015 -جىلى ۋفادا وتكەن ش ى ۇ سامميتىندە ۇيىمعا مۇشە مەملەكەتتەر ءۇندىستان مەن پاكىستاندى ۇيىمعا مۇشە ەتىپ قابىلداۋدى ۇسىندى. 2016 -جىلى تاشكەنتتە وتكەن ش ى ۇ سامميتىندە ءۇندىستان مەن پاكىستاندى مۇشەلىككە قابىلداۋ تۋرالى مەموراندۋمعا قول قويىلدى. قازىرگى ۋاقىتتا ش ى ۇ- عا مۇشە مەملەكەتتەر ءۇندىستان جانە پاكىستانمەن بىرلەسە وتىرىپ، مەموراندۋمدا كورسەتىلگەن مىندەتتەمەلەردى ورىنداپ جاتىر، بارلىق جۇمىستار ءساتتى جۇرگىزىلۋدە»، - دەپ جاۋاپ بەردى.
حۋا چۋنيننىڭ ايتۋىنشا، استانادا وتەتىن ش ى ۇ سامميتىندە ءۇندىستان مەن پاكىستاندى ۇيىمعا مۇشە ەتىپ قابىلداۋ پروتسەسى تولىعىمەن اياقتالادى. اتپ ايتقاندا، ش ى ۇ قۇرىلعاننان بەرگى العاشقى ۇيىمدى كەڭەيتۋ جوسپارى جۇزەگە اسىرىلماق. وسىلايشا الەمدە ەڭ حالقى كوپ، اۋماعى ەڭ ۇلكەن ايماقتىق ىنتىماقتاستىق ۇيىم قۇرىلىپ، بۇرىن- سوڭدى بولماعان دامۋ جانە ىنتىماقتاستىق الەۋەتىن جانداندىرا تۇسەتىن بولادى.
«ءبىز ءۇندىستان مەن پاكىستاندى ۇيىمعا مۇشەلىككە قابىلداعاننان سوڭ، ولاردىڭ «شاڭحاي ىنتىماقتاستىق ۇيىمىنىڭ حارتياسى» جانە «شاڭحاي ىنتىماقتاستىق ۇيىمىنا مۇشە مەملەكەتتەردىڭ ۇزاق مەرزىمدى تاتۋ كورشىلىك، دوستىق جانە ىنتىماقتاستىق تۋرالى شارتى» ەرەجەلەرىن قاتاڭ ساقتاۋىن قالايمىز. سونىمەن قاتار دوستىق ىنتىماقتاستىقتى نىعايتىپ، «شاڭحاي رۋحى» ۇستانىمىن جالعاستىرىپ، ءوزارا قاتىناستى جاقسارتىپ، ۇيىمنىڭ دامۋىنا بىرلەسىپ اتسالىسۋىن قالايمىز»، - دەيدى ق ح ر س ى م- نىڭ رەسمي وكىلى.
اۆتور: اڭعار قانان