مەملەكەتتىك رامىزدەرگە دەگەن قۇرمەت وتباسىنان باستالۋى ءتيىس - ەرلان قاناليموۆ
بۇل تۋرالى بۇگىن «قازاقستان رەسپۋبليكاسىنىڭ مەملەكەتتىك رامىزدەرى. 25 جىل: تاريح پەن قولدانۋ تاجىريبەسى» اتتى عىلىمي، پراكتيكالىق كونفەرەنتسيادا استانا قالاسى ىشكى ساياسات باسقاراماسىنىڭ باسشىسى ەرلان قاناليموۆ ءمالىم ەتتى.
«مەملەكەتتىك سيمۆولدارعا دەگەن قۇرمەت پەن ۇقىپتىلىق وتباسىدان باستالۋى ءتيىس. بۇل جاس بۋىننىڭ مادەني، رۋحاني جانە ادامگەرشىلىك تاربيەسىندە ۇلكەن ءرول اتقارادى. ءاربىر ازامات مەملەكەتتىك سيمۆولداردى سىيلاعان كەزدە عانا ءوز ەلىنىڭ شىن پاتريوتى بولىپ قالىپتاسادى. مەملەكەتتىك سيمۆولدارعا كورسەتىلگەن قۇرمەت ارقىلى ءبىز ءوزىمىزدىڭ بىرلىگىمىزدى جانە اۋىزبىرشىلىگىمىزدى كورسەتەمىز. بۇل ءبىزدىڭ زامان اعىمىنان قالىس قالماۋىمىزعا سەپتىگىن تيگىزەدى»، - دەدى ەرلان قاناليموۆ.
سونىمەن قاتار ول ۇلگى رەتىندە پرەزيدەنتتىڭ سوزدەرىن كەلتىردى: «ەل ازاماتتارىنىڭ مەملەكەتتىك سيمۆولدارعا دەگەن قارىم- قاتىناسى ارقىلى ولار قانشالىقتى سول ەلدىڭ ازاماتتارى، پاترياوتتارى رەتىندە سەزىنەتىندىكتەرىن، بولاشاققا دەگەن سەنىمدەرىن وڭاي بايقاۋعا بولادى» .
«بىزگە حالىقارالىق ارەنالاردا ەلىمىزدىڭ كوك تۋى جەلبىرەگەنى، كوك بايراقتىڭ استىندا الەمدىك مەملەكەتتەردىڭ باسشىلارى جينالعانى، ماڭىزدى شەشىمدەردى قابىلداپ جاتقانى ۇنايدى. قىسقا ارالىقتا ونداعان ماڭىزدى حالىقارالىق فورۋمدار مەن جيىندار وتكەن جاس ەلوردامىزدىڭ جەتىستىگى كۋا»، - دەپ اتاپ ءوتتى ەرلان قاناليموۆ.
ول جينالعان قاۋىمدى كەلە جاتقان ق ر مەملەكەتتىك سيمۆولدارىنىڭ كۇنىمەن قۇتتىقتاپ، بىرەر كۇندە استانادا «ەكسپو-2017» حالىقارالىق كورمەسىنىڭ باستالاتىنىن ەسكە سالدى. وعان جالپى سانى 2 ميلليونعا جۋىق تۋريست كەلمەك.
«بۇل ءبىز ءۇشىن ۇلكەن سىناق جانە ۇلكەن ابىروي»، - دەپ ءتۇيدى ءسوزىن ەرلان قاناليموۆ.
اۆتور: جاسۇلان جولدىبايەۆ