ەلباسى تۇركيا پرەمەر- ءمينيسترىنىڭ ورىنباسارىن قابىلدادى
15:38, 02 - ماۋسىم 2017
استانا. قازاقپارات - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ تۇرىك رەسپۋبليكاسى پرەمەر- ءمينيسترىنىڭ ورىنباسارى تۇعرۇل تۇركەشپەندى قابىلدادى، دەپ حابارلايدى اقوردانىڭ باسپا ءسوز قىزمەتى.
كەزدەسۋدە قازاقستان پرەزيدەنتى تۇركيانىڭ بىزگە جاقىن ءارى اعايىن ەلدەردىڭ ءبىرى ەكەنىن اتاپ ءوتتى.
- قازاقستان تاۋەلسىزدىك العاننان بەرگى 25 جىل ىشىندە ءبىزدىڭ ءوزارا قارىم- قاتىناسىمىز بارلىق باعىت بويىنشا ىلگەرىلەپ، دامىپ كەلەدى، - دەدى مەملەكەت باسشىسى.
ت. تۇركەش ءوزىن قابىلداعانى ءۇشىن نۇرسۇلتان نازاربايەۆقا العىس ايتىپ، تۇرىك رەسپۋبليكاسىنىڭ پرەزيدەنتى رەجەپ تايىپ ەردوعاننىڭ سالەمىن جەتكىزدى.
- تۇرىك رەسپۋبليكاسى مەن قازاقستان اراسىنداعى قاتىناستاردىڭ تامىرى تەرەڭدە. قازاقستاننىڭ حالىقارالىق ۇيىمدار قىزمەتىنە، اسىرەسە، ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە بەلسەنە قاتىسۋى تۇركيا ءۇشىن ماڭىزدى، - دەدى تۇركيا پرەمەر- ءمينيسترىنىڭ ورىنباسارى.