ەكسپو كورمەسى اياسىندا «بايقوڭىر» عارىش ايلاعىنا تۋريستەر تارتىلادى
ەكسپو كورمەسىنە وبلىس اتىنان «قىزىلوردا قالاسىندا ەسكى اۆتوكولىك دوڭگەلەكتەرىن قايتا وڭدەۋ (قالپىنا كەلتىرۋ) ارقىلى رەزەڭكە ۇنتاقتارى مەن جەر استى سۋارۋ تۇتىكتەرىن شىعاراتىن ءوندىرىسىن ۇيىمداستىرۋ»، «قىزىلوردا وبلىسىندا كۇنىنە 50 مۆت ەلەكتر ەنەرگياسىن شىعاراتىن بايقوڭىر كۇن ەلەكتر ستانسياسىن سالۋ» ت. ب. سياقتى 6 يننوۆاتسيالىق جوبا ۇسىنىلادى.
وبلىس كورمە وتكىزىلگەن ۋاقىت ىشىندە استانانى 7608 توننا ونىممەن قامتۋى ءتيىس. وبلىستىق اۋىل شارۋاشىلىعى باسقارماسىنىڭ باسشىسى باقىت جاقانوۆتىڭ ايتۋىنشا، بۇعان دەيىن كۇرىش پەن بالىقتىڭ العاشقى پارتياسى جىبەرىلگەن. «3-4- ماۋسىمدا اتىراۋ، باتىس قازاقستان وبلىستارىمەن بىرلەسىپ جارمەڭكە وتكىزەمىز. مۇنداي جارمەڭكەلەر 15-16- شىلدەدە، 5-6- تامىزدا، 16-17- قىركۇيەكتە دە ۇيىمداستىرىلادى»، - دەدى باسقارما باسشىسى.
بريفينگە قاتىسۋشىلاردى وبلىستىق مادەنيەت، ارحيۆتەر جانە قۇجاتتاما باسقارماسى باسشىسىنىڭ ورىنباسارى جانات قۇرامىسوۆا استاناداعى قىزىلوردانىڭ ونەرى مەن مادەنيەت كۇندەرى اياسىندا وتكىزىلەتىن ءىس-شارالارمەن تانىستىردى. سونداي-اق استانادا وتەتىن حالىقارالىق كورمە اياسىندا «بايقوڭىر» عارىش ايلاعىنا تۋريستەردى تارتۋ ماقساتىندا وتاندىق تۋروپەراتورلارمەن جۇمىستار جۇرگىزىلىپ جاتىر ەكەن.
«كورمەنى وتكىزىلۋ كەزەڭىندە «استانا - بايقوڭىر - استانا» جانە «الماتى - بايقونىر - الماتى» باعىتىندا جۇيەلى تۇردە قاتىنايتىن اۋە رەيستەرىن اشۋ جوسپارلانىپ وتىر. «بايقوڭىر» عارىش ايلاعىنا تۋريستەردى تارتۋ ماقساتىندا وتاندىق تۋروپەراتورلارمەن جۇمىس جۇرگىزىلۋدە. ولاردىڭ مالىمەتى بويىنشا كوپتەگەن شەتەلدىك تۋريستەر (انگليا، گەرمانيا، قىتاي) «بايقوڭىر» عارىش ايلاعىن كورۋدى جوسپارلاپ وتىر، - دەيدى «ەكسپو-2017» رەسۋرستىق ورتالىعىنىڭ ديرەكتورى جاندوس تۇسماعامبەتوۆ.
اۆتور: ەلۋباي اۋەزوۆ