اقتاۋلىق قىز سۋدا جۇزۋدەن رەكورد ورناتتى

استانا. قازاقپارات - اقتاۋلىق توميريس مولجانوۆا سۋدا جۇزۋدەن وتكەن رەسپۋبليكالىق چەمپيوناتتا التىن مەدالدى جەڭىپ الدى.

رادمير احمەديانوۆ چەمپيوناتتىڭ «قولا» جۇلدەگەرى اتاندى. بۇل تۋرالى جەلكەندى سپورت تۇرىنەن بالالار مەن جاس وسپىرىمدەر سپورت مەكتەبىنىڭ ءجۇزۋ ءبولىمىنىڭ باپكەر-ۇستازى الەكساندر كابارگين ءمالىم ەتتى، دەپ حابارلايدى lada.kz.

شىمكەنتتە 31- مامىر كۇنى اياقتالعان سۋدا جۇزۋدەن ق ر چەمپيوناتىندا 2005-جىلى تۋعان جانە ودان جاس 450 ۇلدار مەن قىزدار قاتىستى. وندا ماڭعىستاۋ وبلىسىنىڭ اتىنان جەلكەندى سپورت بالالار مەن جاس وسپىرىمدەرگە ارنالعان سپورت مەكتەبىنىڭ سۋدا ءجۇزۋ ءبولىمىنىڭ تاربيەلەنۋشىلەرى ونەر كورسەتتى.

توميريس مولجانوۆا 200 مەترگە قاشىقتىققا براسس ادىسىمەن جانە 400 مەترگە كەشەندى جۇزۋدەن وسى جاستاعى قىزدار اراسىندا جانە وسى قاشىقتىق بويىنشا قازاقستان رەسپۋبليكاسىنىڭ رەكوردىن ورناتىپ، چەمپيون اتاندى.

مولجانوۆا كورسەتكەن ناتيجە 5 مينۋت 51,63 سەكۋندتى قۇرادى. «مەنىڭ جۇزۋمەن اينالىسىپ جۇرگەنىمە 4 جىل بولدى. قازاقستان چەمپيوناتىندا قول جەتكىزگەن جەتىستىك ءبىزدىڭ باپكەرىمىز ەكەۋمىزدىڭ رەسپۋبليكالىق دەڭگەيدەگى ءبىرىنشى جەڭىسىمىز»، - دەدى توميريس.

رادمير احمەديانوۆ بولسا، 400 مەتر قاشىقتىققا كەشەندى ءجۇزۋ ءادىسى بويىنشا «قولا» جۇلدەگە قول جەتكىزدى.

«بۇل چەمپيوناتتىڭ باعدارلاماسىنداعى ەڭ ءبىر كۇردەلى قاشىقتىقتاردىڭ ءبىرى، سوعان قاراي ول سپورتشىدان مىقتى تەحنيكالىق دايىندىقتى قاجەت ەتەدى»، - دەدى الەكساندر كابارگين.