اق جايىق جۇرتشىلىعى بەلگىلى تاريحشى-عالىمدى ەسكە الدى - فوتو

ورال. قازاقپارات - قادىر مىرزا ءالي اتىنداعى مادەنيەت جانە ونەر ورتالىعىندا بەلگىلى عالىم، تاريح عىلىمدارىنىڭ دوكتورى، پروفەسسور، ق ر ءبىلىم بەرۋ ءىسىنىڭ ۇزدىگى، بوكەي ورداسى اۋدانىنىڭ «قۇرمەتتى ازاماتى» باقتىعۇل ءبىرىمجاروۆتى ەسكە الۋعا ارنالعان

«تاريحتىڭ تەرەڭىنەن مارجان سۇزگەن...» اتتى عيبراتتى كەش ءوتتى، دەپ حابارلايدى «قازاقپارات» ءتىلشىسى.

وندا تاريح عىلىمدارىنىڭ دوكتورى، اكادەميك تۇياقباي رىسبەكوۆ باقتىعۇل بىرىمجاروۆپەن قاز م ۋ- دىڭ تاريح فاكۋلتەتىندە قاتارلاس ءبىلىم الىپ، سودان كەيىن ورال پەداگوگيكالىق ينستيتۋتىندا (قازىرگى م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىندە) ۇزاق جىل بىرگە قىزمەت ەتكەنىن ايتىپ، ونىڭ عالىمدىق كەلبەتىنە، ونەرپازدىعىنا جانە ادامگەرشىلىك قىرلارىنا توقتالدى.

«جولداستارى ءۇشىن بارىن ءبولىپ بەرۋگە دايار ۇلكەن جۇرەكتى، جانى جايساڭ ازامات ەدى. عالىمدىعىنا قوسا دومبىرا شەرتەتىن ونەرى دە بار-تىن. ول عىلىممەن تەرەڭ اينالىسىپ قانا قويماي، كوپتەگەن شاكىرت تاربيەلەي ءبىلدى. سولاردىڭ ىشىندە الفيا بايبولسىنوۆا مەن ەسقايرات حايداروۆ تاريح عىلىمدارىنىڭ كانديداتى اتانىپ، ۇستازىنىڭ ءۇمىتىن اقتادى.

زايىبى ساۋلەنىڭ ەرتە دۇنيە سالۋى عالىمعا وڭاي تيگەن جوق. ءومىرىنىڭ سوڭعى جىلدارى اۋىرىپ، كوزى دە كورمەي قالدى. نەبارى 62 جاسىندا دۇنيەدەن وتكەن اسىل ازاماتتىڭ ەسىمىن ءبىز ۇمىتپايمىز»، دەدى ت. رىسبەكوۆ.

سول سەكىلدى بوكەي ورداسى اۋدانىنداعى م. مامەتوۆا اتىنداعى سايقىن ورتا مەكتەبىندە بىرگە وقىعان نۇرلىبەك ءبىرمانوۆ، قاز م ۋ- دا ءبىر توپتا ءبىلىم العان اتىراۋلىق تاريحشى-عالىم جەڭىسبەك مۇستافين، دومبىراشى، قازاقستاننىڭ ەڭبەك سىڭىرگەن مادەنيەت قىزمەتكەرى ەرمەك قازيەۆ، بوكەي ورداسى اۋداندىق ءماسليحاتىنىڭ حاتشىسى ەربولات تاڭاتوۆ جانە باسقالار جىلى لەبىزدەرىن ءبىلدىرىپ، ەستەلىكتەرىمەن ءبولىستى.

1947-جىلى 1- ماۋسىمدا بوكەي ورداسى اۋدانى سايقىن اۋىلىندا دۇنيەگە كەلگەن باقتىعۇل قابدىر ۇلى ءتىرى بولسا، 70 جاسقا تولار ەدى. وسىدان جارتى عاسىر بۇرىن، 1966-1967-جىلدارى سايقىن ورتا مەكتەبىندە مۇعالىم بولىپ ۇلگەرگەن باقتىعۇل ءبىرىمجاروۆ 1972-جىلدان ينستيتۋت پەن ۋنيۆەرسيتەتتە وقىتۋشى عانا ەمەس، تاريح فاكۋلتەتىنىڭ دەكانى، كافەدرا مەڭگەرۋشىسى سىندى جاۋاپتى قىزمەتتەردى دە ابىرويمەن اتقاردى.

1997-جىلى تۋرا ەلۋ جاسىندا دوكتورلىق ديسسەرتاتسياسىن قورعاعان عالىم سوڭىندا جارقىن ءىز قالدىردى.

«بىرەگەي تاريحشى-عالىم باقتىعۇل ءبىرىمجاروۆتىڭ ەسىمىن ماڭگى ەستە قالدىرۋ شارالارىن ويلاستىرعان ابزال. ورال قالاسى مەن بوكەي ورداسى اۋدانىندا كوشە مەن مەكتەپكە اتىن بەرسە، ارتىق ەمەس. سونداي-اق ءوزى ەڭبەك ەتكەن م. وتەمىسوۆ اتىنداعى ۋنيۆەرسيتەتتە ءدارىسحانا اشۋ قاجەت»، - دەدى ەڭبەك ارداگەرى، م. ىقسانوۆ اتىنداعى قوردىڭ ءتوراعاسى اسقار اتايەۆ.

شارا بارىسىندا عالىمنىڭ كوزى تىرىسىندە شىعىپ ۇلگەرمەگەن «بوكەي ورداسى» مونوگرافياسى مەن «پەرزەنت پارىزى» اتتى كىتابىنىڭ جاڭارتىلعان نۇسقاسىنىڭ تانىستىرىلىمى بولدى.

اسەل باقتىعۇل قىزى كەشتى ۇيىمداستىرۋشىلارعا العىسىن ءبىلدىرىپ، اتالمىش كىتاپتىڭ العاشقى دانالارىن بوكەي ورداسى اۋدانى اكىمدىگى مەن تاريحي-مۋزەي كەشەنىنە سىيعا تارتتى.