فيليپپين اۋە كۇشتەرى قاتەلىكپەن ءوز اسكەري شەبىن بومبالادى

استانا. قازاقپارات - فيليپپيننىڭ ماراۆي شاھارىندا لاڭكەستەرگە قارسى ءجۇرىپ جاتقان ۇرىس كەزىندە ۇكىمەت ۇشاقتارىنىڭ قاتەلىگىنەن 10 سارباز قازا تاپتى.

 تاعى 7 جاۋىنگەر جارالانعان. قورعانىس مينيسترلىگىنىڭ مالىمدەۋىنشە، بۇل جاعدايلارعا اسكەريلەردىڭ ءبىر- ءبىرىن تۇسىنبەي قالۋى سەبەپ بولۋى مۇمكىن. قازىر وقيعا تەكسەرىلىپ جاتىر.

 ەستەرىڭىزگە سالا كەتەيىك، وتكەن اپتانىڭ باس كەزىندە سودىرلار ەلدىڭ وڭتۇستىگىندەگى ماراۆي قالاسىنا باسىپ كىرىپ، شىركەۋدەگى ادامداردى كەپىلدىككە العان. سوعان وراي ارنايى وپەراتسيا باستالىپ، مينداناو ايماعىندا توتەنشە جاعداي جاريالاندى. شاھارداعى ۇرىس كەزىندە 120 سودىردىڭ كوزى جويىلعان. 38 سارباز قازا تاۋىپ، 20-داي تۇرعىن وپات بولدى.

 ال بيلىكتىڭ مالىمدەۋىنشە، قالاعا باسىپ كىرگەن سودىرلار - «يراك جانە ليەۆانت لاڭكەستىك ۇيىمىنا» قوسىلعان جەرگىلىكتى «ماۋتە» مەن «ابۋ ساياف» قارۋلى توپتارىنىڭ وكىلدەرى. ولاردىڭ اراسىندا باسقا ەلدەردىڭ ازاماتتارى بار.

www.24.kz