قىزىلوردا مەن قىرعىزستاننىڭ نارىن قالاسى ءوزار ىنتىماقتاسپاق
بۇل تۋرالى قازاقپارات ءتىلشىسى حابارلادى. كەزدەسۋگە قىرعىز رەسپۋبليكاسىنىڭ Ⅲ دارەجەلى مەملەكەتتىك كەڭەسشىسى، قىرعىز رەسپۋبليكاسىنىڭ ۇلتتىق عىلىم اكادەمياسى پرەزيدەنتىنىڭ عىلىمي حاتشىسى ورمۋشيەۆ كالنۋر كەلديبەك ۇلى، «قىرعىزستان» پارتياسى ءتوراعاسىنىڭ ورىنباسارى، نارىن قالالىق كەڭەسىنىڭ دەپۋتاتى كۋرمانوۆ داۆيد ۋسەنبەك ۇلى جانە قىزىلوردا قالاسىنىڭ اكتيۆى قاتىستى.
جۇزدەسۋ بارىسىندا قالا اكىمى ن. نالىبايەۆ قازاق ەلى مەن قىرعىز باۋىرلار اراسىندا ادەبي، رۋحاني، الەۋمەتتىك - ەكونوميكالىق بايلانىستاردىڭ سان عاسىرلار بويى ۇزىلمەي كەلگەندىگىن اتاپ ءوتتى.
«ەجەلدەن ەنشىسى بولىنبەگەن ەكى ەلدىڭ تۇرمىس-سالتى، ادەت-عۇرىپتارى، ءتىپتى تالايلى تاعدىرى دا ۇقساس كەلەدى. قارت الاتاۋدىڭ قوس بەتىن مەكەندەگەن ەكى حالىق اراسىندا جىر كوشى دە تولاستاماعان. تاۋداي تۇلعالى اباي مەن ماناستىڭ، كومەكەيىنە بوزتورعاي ۇيا سالعان توقتاعۇل مەن جامبىلدىڭ، زامانىمىزدىڭ زاڭعار بيىگىنە اينالعان مۇحتار مەن شىڭعىستىڭ ەگىز ەلدىڭ ادەبيەتىنىڭ كوشباستاۋشىلارى عانا ەمەس، رۋحاني باۋىرلاستىقتىڭ دانەكەرى رەتىندە دە شوقتىعى بيىك تۇرادى. وسى رەتتە، «قازاق - قىرعىز ءبىر تۋعان» دەپ، اتا-بابالارىمىز جالعاپ كەتكەن التىن كوپىردىڭ ىرگەسىن بەرىك ۇستاپ، ەكى ەل اراسىنداعى دوستىقتى ودان ءارى نىعايتۋ سىزدەر مەن بىزدەردىڭ باستى پارىزىمىز دەپ بىلەمىن. بۇگىنگى باس قوسۋىمىز دا وسىنى اڭعارتادى. ەندەشە، سىر ەلىنىڭ باس شاھارىنا قوش كەلدىڭىزدەر»، - دەي كەلە، قوناقتارعا قىزىلوردا قالاسىنىڭ تاريحى مەن بۇگىنگى جەتىستىكتەرى تۋرالى قىسقاشا ايتىپ ءوتتى.
12 باپتان تۇراتىن مەموراندۋمدا ەكى قالا اراسىندا ينۆەستيتسيا تارتۋ، كاسىپكەرلىك، اۋىل شارۋاشىلىعى، قۇرىلىس، قورشاعان ورتانى قورعاۋ، دەنساۋلىق ساقتاۋ، ءبىلىم، مادەنيەت، سپورت جانە تۋريزم سەكىلدى الەۋمەتتىك سالالار بويىنشا ىنتىماقتاستىقتى ارتتىرۋ ماسەلەسى قاراستىرىلعان.
جيىن سوڭىندا، نۇرلىبەك ماشبەك ۇلى قوناقتارعا ەستەلىك سىيلىقتار تابىستاپ، باۋىرلاس ەكى ەلدىڭ اراسىنداعى ىسكەرلىك، ارىپتەستىك ىنتىماقتاستىقتىڭ ارتۋىنا سەپتىگى مول سەرپىندى جوبالاردى بىرلەسىپ جۇزەگە اسىرۋعا شاقىردى جانە قىزىلوردادا العاشقى رەت ۇيىمداستىرىلعان «ارال حالىقارالىق تۇراقتى دامۋ فورۋمىنا» اتسالىسىپ، ورتاق ماسەلەگە وي قوسۋعا ارنايى كەلگەندەرى ءۇشىن العىس ءبىلدىردى.
اۆتور: ەلۋباي اۋەزوۆ