استانا اۋەجايى: جاڭا تەرمينالدىڭ جاڭالىعى نەدە
ءسويتىپ، تىركەۋگە كەتەتىن ءبىراز ۋاقىتتى ۇنەمدەۋگە مۇمكىندىك بار، دەپ حابارلايدى قازاقپارات ءتىلشىسى. جاڭا تەرمينالدا 26 بىردەي تىركەۋ باعاناسى بار. ادەتتە جولاۋشىلار سول جەردەن وتىرعىزۋ تالوندارىن الىپ، جۇكتەرىن تاپسىرىپ جاتادى. وندايدا ۇزىن- سونار كەزەكتەر بولادى. وعان قوسا، تىركەۋدەن ءوتۋ ءۇشىن، كەم دەگەندە، ءبىر ساعات بۇرىن كەلۋ كەرەك. الايدا اۋەجايدىڭ جاڭا عيماراتىندا ورنالاسقان اۆتوماتتى تەرمينالدار ارقىلى وتىرعىزۋ تالوندارىن قولما- قول الۋعا بولادى. ونداي قىزمەت جۇكتەرى از جولاۋشىلار ءۇشىن اسا ءتيىمدى. ءتولقۇجات پەن بيلەت ءنومىرىن ەنگىزگەننەن كەيىن تىركەۋدىڭ كەزەگىنە تۇرماي- اق ارى قاراي وتە بەرەدى. بۇرىن قىزمەتتىڭ بۇل ءتۇرىن تەك «ەير استانانىڭ» جولاۋشىلارى عانا قولدانا الاتىن. ەندى، ونى كەز كەلگەن اۋە كومپانياسىنىڭ كليەنتتەرى پايدالانا الادى.
«جاڭا تەحنولوگيانىڭ تاعى ءبىر ءتۇرى ول - شتريح-كود ارقىلى تىركەۋدەن ءوتۋ قىزمەتى. وندايدا تالون الۋدىڭ قاجەتى جوق. ادام جاڭاعى تەرمينالداردىڭ كومەگىنە جۇگىنبەسە دە بولادى. جولاۋشى اسىعىپ تۇرسا، ينتەرنەت ارقىلى بيلەتتى ساتىپ الىپ، تىركەۋدەن وتسە، اۋە كومپانياسى وعان وتىرعىزۋ تالونىن جىبەرەدى. تالوندا شتريح-كود بار. مىنە، ءدال سول شتريح-كودپەن جولاۋشى ەش كەدەرگىسىز باقىلاۋدىڭ كەلەسى كەزەڭىنە وتە الادى» ، - دەدى استانا حالىقارالىق اۋەجايىنىڭ باسپا ءسوز حاتشىسى كاميلا قاسىمبەكوۆا قازاقپارات تىلشىسىنە بەرگەن سۇحباتىندا.
ايتا كەتەيىك، بۇگىن مەملەكەت باسشىسى نۇرسۇلتان نازاربايەۆ استانا اۋەجايىنىڭ جاڭا تەرمينالىن اشتى. تەرمينالدىڭ جۇك وتكىزۋ جۇيەسى دە زامان تالابىنا ساي. «اتالعان جۇيەنىڭ باستى ەرەكشەلىگى سول، قانداي دا ءبىر قاۋىپتى جۇكتەر بولسا، ونىڭ بارلىعى اۆتوماتتى تۇردە بىردەن باسقا جولاقپەن كەتەدى دە، قاۋىپسىز ايماققا شىعارىلادى» ، - دەيدى اۋەجايدىڭ باس ديرەكتورى رادىلبەك ءاديمولدا.
اۆتور: ارمان اسقاروۆ