گۇلزيرا ايداربەكوۆا بيبىگۇل تولەگەنوۆانىڭ سىنىنا جاۋاپ بەردى

استانا. قازاقپارات - قايرات نۇرتاستىڭ اناسى ۇلىن «جەرگە» تەڭەگەن بيبىگۇل تولەگەنوۆانىڭ سىنىنا جاۋاپ بەردى.

Stan.kz تىلشىسىنە بەرگەن سۇحباتىندا گۇلزيرا ۇسەن قىزى قايراتتى جەردەن الىپ، جەرگە سالعان سايىن جۇرەگى تىلىنەتىنىن ايتتى. سوعان قاراماستان، بيبىگۇل تولەگەنوۆاعا رەنجىمەيتىنىن جەتكىزدى.

قايراتتىڭ اناسى ۇلىنىڭ جاستاي ساحناعا شىعىپ، ءتۇرلى بايقاۋلارعا قاتىسقانىن اتاپ ءوتتى. مۋزىكالىق ءبىلىمى تۋرالى دا ءسوز قوزعادى.

«قايرات 16 جاسىندا جۇسىپبەك ەلەبەكوۆ اتىنداعى ەسترادا جانە سيرك كوللەدجىنە وقۋعا ءتۇستى. قازاقستاننىڭ حالىق ءارتىسى لاكي كەسوگلۋدىڭ شاكىرتى بولىپ، 4 جىل سول كىسىنىڭ سىنىبىندا ءبىلىم الدى، 17 جاسىندا «ارمان» ءانى حيت بولىپ، بۇكىل قازاقستانعا تانىلدى.

قايرات بالا كەزىنەن ساحناعا شىعىپ، ساحنانىڭ كيەلىلىگىن تۇسىنگەن ادام. ارينە رەسپۋبليكالىق كونكۋرستارعا قاتىسىپ، جۇلدەلى ورىندارعا يە بولعان. «بوزتورعاي» بايقاۋىندا - 1-ورىن، «ءانشى بالاپاندا» - 3-ورىن، «ءانشى بولعىم كەلەدى» - 2-ورىن، حالىقارالىك «شابىت» فەستيۆالىنىڭ لاۋرەاتى، «الماتى اۋەنى» انشىلەر بايقاۋىندا - 1-ورىن، رەسپۋبليكالىق اباي وقۋلارىندا - 1-ورىن، «جاس دارىن» انشىلەر بايقاۋىندا - 1-ورىن، «ساز الەمى» تەلە- جوبالىك بايقاۋىندا باس جۇلدەنى يەلەندى. رەسەيلىك «مۋزتۆ» ارناسىنىڭ «ەڭ ۇزدىك قازاقستاندىق ءانشى» اتالىمىن جەڭىپ الدى»، - دەپ اتاپ ءوتتى قايراتتىڭ اناسى.

گۇلزيرا ايداربەكوۆا قايرات پەن ديماشتىڭ اعا-ءىنى رەتىندە جاقسى ارالاساتىنىن تىلگە تيەك ەتتى.

«قايرات ديماشتى ءىنىسى رەتىندە جاقسى كورەدى، سىيلايدى. ارينە، ارالاسادى»، - دەدى ول.

بۇدان كەيىن گۇلزيرا ۇسەن قىزى بيبىگۇل تولەگەنوۆانىڭ سىنىنا جاۋاپ بەردى.

«ال بيبىگۇل اپامىزدىڭ سىنى قانشالىقتى ورىندى، ورىنسىز ەكەنىن حالىق ايتادى. ءار ادامنىڭ ءوز ويى، پىكىرى بار.

قايرات ءۇشىن ءوزىنىڭ سۇيىكتى اپايى، قازاقتىڭ بۇلبۇلى بيبىگۇل تولەگەنوۆانىڭ ەكى قازاقتىڭ بالالارىن بىرەۋىن «كوككە»، ەكىنشىسىن «جەرگە» تەڭەگەنى ارينە، وڭاي ءتيدى دەپ ويلامايمىن. ءبىراق قۇدايدىڭ جاراتقان جەرىنەن ءنار الىپ، جەر باسىپ ءومىر ءسۇرىپ ءجۇرمىز، دەمىمىز تاۋسىلعاندا دا جەرگە تاپسىرىلامىز، سوندىقتان «جەرگە» تەڭەگەنىنە اسا ءبىر قاتتى رەنجىپ وتىرعان جوقپىن.

جالپى سالىستىرعاندا تۇرعان ەشتەڭە جوق. باسەكە بارلىق جەردە بولادى. اينالىپ كەلگەندە سارالاپ الاتىن حالىق! كوتەرەتىن دە حالىق، وشىرەتىن دە حالىق! باۋىر ەتىڭ بالاڭدى جەردەن الىپ، جەرگە سالىپ جاتسا كەز-كەلگەن انانىڭ جۇرەگىن پىشاقپەن تىلگەنمەن بىردەي. مەن ءاردايىم سابىرعا كەلىپ، بالالارىمنىڭ اماندىعىن، ابىرويلى بولعانىن اللادان سۇراپ وتىرامىن»، - دەپ تۇيىندەدى ءسوزىن قايراتتىڭ اناسى ءارى پروديۋسەرى.

ەسكە سالا كەتەيىك، بيبىگۇل تولەگەنوۆا قايرات پەن ديماشتى سالىستىرۋعا كەلمەيتىنىن ايتىپ، قايراتتى - جەرگە، ال ديماشتى كوككە تەڭەگەن ەدى.