يندونەزيا كومپانيالارى قازاقستاننىڭ تاۋ-كەن سالاسىنا ينۆەستيتسيا سالماق
بۇل تۋرالى بۇگىن اقوردادا ق ر پرەزيدەنتى نۇرسۇلتان نازاربايەۆقا سەنىم گراموتاسىن تاپسىرعاننان كەيىن ب ا ق وكىلدەرىنە سۇحبات بەرگەن اتالعان ەلدىڭ توتەنشە جانە وكىلەتتى ەلشىسى راحمات پرامونو ءمالىم ەتتى، دەپ حابارلايدى قازاقپارات.
«جەكە سەكتوردا يندونەزيالىق ەكى كومپانيا قازاقستاننىڭ فراماتسيەۆتيكا مەن تاۋ-كەن سالاسىنا ينۆەستيتسيا سالۋدى جوسپارلاپ وتىر»، - دەدى يندونەزيا ەلشىسى.
راحمات پرامونو ءوز سوزىندە ەكى ەلدىڭ اراسىنداعى ىنتىماقتاستىقتىڭ قارقىندى دامىپ كەلە جاتقاندىعىن جانە وتە جوعارى دەڭگەيدە ەكەندىگىن باسا ايتقان بولاتىن.
مۇنان بولەك، ول قازاقستان مەن يندونەزيا اراسىنداعى ءوزارا قارىم-قاتىناستى ودان ارى دامىتىپ، نىعايتۋعا بار كۇش-جىگەرىن جۇمسايتىندىعىن اتاپ وتكەن ەدى.
ايتا كەتەرلىگى، يندونەزيا ەلشىسىنەن سەنىم گراموتاسىن قابىلداعان قازاقستان پرەزيدەنتى استانا مەن دجاكارتا اراسىنداعى ساياسي، حالىقارالىق ماسەلەلەردەگى كوزقاراس بىردەيلىگىن، ەكى مەملەكەتتىڭ ساۋدا-ەكونوميكالىق قارىم-قاتىناستارىنىڭ الەۋەتى جوعارى ەكەندىگىن، بۇل سالاداعى ىقپالداستىقتى دامىتۋدا ەكى ەل ۇكىمەتتەرىنىڭ بەلسەنە قىزمەت اتقارۋى تيىستىگىن ايتقان بولاتىن.
اۆتور: مارلان جيەمباي