قىتاي قازاقستاننان جىلقىنى كوپتەپ ساتىپ الماقشى

استانا. قازاقپارات - قىتاي نارىعى قازاقستاننىڭ بالىعى مەن جىلقىسىنا اشىق. بۇل تۋرالى ۇكىمەت وتىرىسىندا ق ر اۋىل شارۋاشىلىعى ءبىرىنشى ۆيتسە- ءمينيسترى قايرات ايتۋعانوۆ ءمالىم ەتتى، دەپ حابارلايدى قازاقپارات.

«ۆەتەريناريا سالاسىندا 25 - مامىردا قازاقستان قالعان 5 وبلىس (ش ق و، وقو، الماتى، جامبىل،  قىزىلوردا وبلىستارى) ءۇشىن اۋسىلدان تازا ايماق مارتەبەسىن الدى. بۇل شەشىم ءۇشىن حالىقارالىق ەپيزووتيالىق بيۋروعا مۇشە 180 ەلدەن دەلەگاتتار داۋىس بەردى. بۇل جانۋارلار مەن وسىمدىكتەردەن الىناتىن ونىمدەر ەكسپورتىن ۇلعايتۋعا جاقسى مۇمكىندىك بەرەدى. قىتاي نارىعى قازاقستاندىق بالىق پەن بالىق ونىمدەرى، جىلقى تۇقىمداس اسىل تۇقىمدى جانۋارلار، سونداي- اق بال جانە بال ارا شارۋاشىلىعى ءونىمى ءۇشىن اشىق. ماۋسىم ايىندا مۇزداتىلعان قوي ەتى بويىنشا حاتتاماعا قول قويۋ جوسپارلانۋدا، اتالعان ەلگە تاۋارلى جىلقىلاردى دا تاسىمالداۋ شارتتارى كەلىسىلۋدە» ، - دەپ توقتالدى ايتۋعانوۆ.

ونىڭ سوزىنە قاراعاندا، يرانعا توڭازىتىلعان قوي ەتى مەن ءتىرى قويلاردى ەكسپورتتاۋعا ۆەتەريناريالىق سەرتيفيكاتتاردىڭ جوبالارى كەلىسىلدى جانە مۇزداتىلعان قوي ەتى بويىنشا جۇمىس جۇرگىزىلۋدە. بىرىككەن اراب امىرلىكتەرىنە ءىرى جانە ۇساق قارا مالدى، تاۋىق جۇمىرتقاسىن تاسىمالداۋعا ۆەتەريناريالىق سەرتيفيكاتتارعا قول قويىلدى. «بۇدان باسقا، يزرايل جانە ساۋد ارابياسىنىڭ ۆەتەريناريالىق قىزمەتتەرىمەن جانۋارلاردان الىناتىن قازاقستاندىق ءونىمنىڭ ەكسپورتىن اشۋ بويىنشا جۇمىس جۇرگىزىلۋدە» ، - دەدى ءبىرىنشى ۆيتسە- مينيستر. بۇدان بۇرىن حابارلانعانداي، مامىر ايىندا قازاقستان اۋسىلدان تازا ايماق رەتىندە مويىندالعان بولاتىن.

اۆتور: رۋسلان عابباسوۆ