جىل سايىن بيداي ساپاسى تومەندەپ كەلەدى - ا ش م
«كوكتەم كەش كەلگەنىمەن، ەگىس القاپتارىنداعى جۇمىس قارقىنى وتكەن جىلدىڭ دەڭگەيىنە جەتتى»، - دەپ توقتالدى ول.
سونىمەن قاتار ءبىرىنشى ۆيتسە- مينيستر ەگىستىك القاپتارىن ءارتاراپتاندىرۋ جۇرگىزىلۋدە، وسى ورايدا 2021 -جىلعا دەيىن مينيسترلىكتەر مەن اكىمدىكتەر اراسىندا مەموراندۋمدار بەكىتىلگەنىن اتاپ ءوتتى. بۇنىڭ ناتيجەسىندە سۇرانىسقا يە داقىلدار ەگىستەرى 932 مىڭ گەكتارعا كەڭەيتىلۋدە.
بۇدان بولەك ول ەلىمىزدىڭ اۋماعىندا بيداي ساپاسىنا توقتالدى.
«وكىنىشكە قاراي، سوڭعى جىلدارى بيدايدىڭ ساپاسى جىل سايىن تومەندەپ كەلەدى. 2011 -جىلى 1-3 ساناتتاعى بيداي كولەمى 88 پايىزدى قۇرادى، ال 2016 -جىلى 45 پايىزدى قامتىدى. سونىمەن بىرگە كەرىسىنشە ساپاسى تومەن 4-5 ساناتتاعى بيداي 2011 -جىلداعى 10 پايىزدان 2016 -جىلدا 41 پايىزعا دەيىن ارتتى»، - دەپ ءتۇسىندىردى ايتۋعانوۆ.
وسىنى ەسكەرە وتىرىپ، بيىلدان باستاپ ەليتالى تۇقىمداردى سۋبسيديالاۋ قالپىنا كەلتىرىلدى. بيىل تۇقىم شارۋاشىلىعىنا بولىنگەن قاراجات بىلتىرمەن سالىستىرعاندا 3,2 ەسەگە ارتىق. مۇنىمەن قوسا، تىڭايتقىشتاردى قولدانۋدى ىنتالاندىرۋ ماقساتىندا سۋبسيديالاۋ تاسىلدەرى وزگەرتىلدى. سۋبسيديالاناتىن تىڭايتقىشتار سانى وتكەن جىلى 85 بولسا، 2017 -جىلى 161-گە دەيىن ارتتى. بۇگىنشى تاڭدا 200 مىڭ توننا تىڭايتقىش الىندى.
اۆتور: رۋسلان عابباسوۆ