وزبەك جولبارىستارى استاناعا كەلە جاتىر
بۇل جايىندا ق ر بوكس فەدەراتسياسىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
ايتا كەتەرلىگى، قازىرگى ۋاقىتتا ازيانىڭ بوكستان ۇلتتىق فەدەراتسيالارى استانا تورىندە شارشى الاڭعا شىعاتىن ءوز كوماندالارىن جاريا ەتۋدە. ماسەلەن، وزبەكستان بوكس فەدەراتسياسى قىزدار بوكسىنىڭ وليمپيادا ويىندارىنا كىرگەن ءۇش سالماق ساناتى بويىنشا سپورتشىلارىنىڭ ءتىزىمىن ۇسىندى.
اتالعان تىزىمگە سايكەس 52 كەلىدە تۇرسىناي راحيموۆا، 60 كەلىدە ەدگورا ميرزايەۆا، 75 كەلىدە نافيسا اسقاروۆا وزبەك ەلىنىڭ نامىسىن قورعاماق. ال ەرلەر قۇرامىنداعى 10 بوكسشىنىڭ 7-ەۋى Uzbek Tigers كلۋبىنىڭ ساپىندا ونەر كورسەتەدى. ولاردىڭ قاتارىندا نادير ميرزاحمەدوۆ (49 كەلى) ، 2015 -جىلى گاللادا وتكەن تۋرنيردىڭ چەمپيونى ابرور كادىروۆ (52) ، WSB سەرياسىندا وتانداسىمىز ءىلياس سۇلەيمەنوۆپەن جۇدىرىق تۇيىستىرگەن ابدۋلحاي شاراحماتوۆ (56)، ۋلۋگبەك كوميلوۆ (64) ، 2014 -جىلى ازيانىڭ قولا مەدالىن جەڭىپ العان فازليددين مەليبويەۆ (69)، يسلاميادا-2017 شيرەك فينالىندا قازاقستاندىق تۇرسىنباي قۇلاحمەتكە ەسە جىبەرگەن ماحمۋد گايپوۆ (75) جانە 2009 -جىلعى جاسوسپىرىمدەر اراسىندا الەم چەمپيونى ميرزوبەك حاسانوۆ بار. مۇنان بولەك، ق ر پرەزيدەنتى كۋبوگىندا وزبەكستان اتىنان 2014 -جىلعى جاسوسپىرىمدەر وليمپياداسىنىڭ كۇمىس جۇلدەگەرى سۋلايمون لاتيپوۆ (60)، كوزيم ماردانوۆ (81) جانە رۋستام يسمايلوۆ (91+) سىنعا تۇسەدى.
بۇگىندە بۇل بايراقتى باسەكەگە قىرعىزستان، تاجىكستان، وڭتۇستىك كورەيا، ءۇندىستان، رەسەي، فيليپپين، ۋكراينا، موڭعوليا جانە يراننىڭ بوكسشىلارى قاتىساتىندىعى بەلگىلى. ال قازاقستان اتىنان بوكسشىلارىمىز بىرنەشە قۇرامادا جارىس جولىنا شىعادى. ق ر پرەزيدەنتى كۋبوگى ءۇشىن وتەتىن تارتىسى كەزدەسۋدەر 5 - ماۋسىم كۇنى «داۋلەت» سپورت كەشەنىندە باستالادى. فينالدىق كەزدەسۋلەر 10- ماۋسىمعا جوسپارلانعان.
اۆتور: مارلان جيەمباي