قىز الىپ قاشىپ، باسى داۋعا قالعان جىگىت ەكى-ءۇش كۇندە تۇرمىسقا شىعاتىن قىز ىزدەپ ءجۇر
اۆتوردىڭ جازۋىنشا، تاياۋدا قۇربىسى قوڭىراۋ شالىپ، ەكى-ءۇش كۇن اراسىندا تۇرمىسقا شىعاتىن جاقسى قىز كەرەك ەكەنىن ايتقان. دوسىنىڭ بۇل قىلىعىن تۇسىنبەگەن اۆتور قۇربىسىنىڭ ۇيىنە بارىپ، وقيعانىڭ ءمان-جايىن ءوزى بىلمەكشى بولادى.
«بارسام، قۇربىمنىڭ ۇيىندە كوپ ادام جينالىپ، ءبىر نارسەنى قىزۋ تالقىلاپ وتىر. سول جەردە قىز ىزدەگەن جىگىتتىڭ دە بارىن ءبىلدىم. ەسىمى ەرلان ەكەن. بارلىق ءمان-جايدى ماعان سول ايتىپ بەردى»، - دەگەن اۆتور جىگىتتىڭ وقيعاسىن باياندادى.
«ەرلان وسىدان ەكى جىل بۇرىن ءنازيرا ەسىمدى قىزبەن تانىسىپ، ەكەۋى جاقسى ارالاسىپتى. كەيىن ەرلان ونى ءوزىنىڭ ءۇي-ىشىمەن تانىستىرادى. ءنازيرا جىگىتتىڭ اتا-اناسىنا دا قاتتى ۇناپ قالادى. سودان اكە-شەشەسى ەرلانعا بيىلدان قالماي ۇيلەن، ايتپەسە مىناداي قىزدان ايىرىلىپ قالاسىڭ دەۋدى جيىلەتىپتى.
سودان ەكى جاستىڭ اتا-اناسى تانىسىپ، ءبىر ءدامحانادا «ءتاتتى شاي» ىشكەن. ءبىراق ءنازيرانىڭ اكە-شەشەسى ەكى جاستىڭ ۇيلەنۋلەرىنە ءۇزىلدى-كەسىلدى قارسى بولىپتى.
ءبىراق ارادا بىرنەشە كۇن وتكەننەن كەيىن ەرلان ءنازيرانى ءوزىنىڭ كەلىسىمىمەن الىپ قاشىپ كەتەدى. بۇل كەزدە ەرلاننىڭ ءۇيى قىزۋ دايىندىق ۇستىندە ەكەن. اناسى قاتتى قۋانىپ، ءنازيرانىڭ ماڭدايىنان ءسۇيىپ، وڭ اياقپەن تابالدىرىق اتتاتقىزادى. بەتاشارعا قىزۋ دايىندىق بولىپ جاتقان كەزدە حابارشىعا ادامدار كەتەدى.
الايدا بەتاشارعا دايىندالىپ جاتقان كەزدە ءنازيرانىڭ اكەسى تورگى بولمەگە اشۋلى كۇيمەن كىرىپ كەلىپ ايقايعا باسا جونەلەدى. «سوتقا بەرەمىن! مەن سەندەرگە قازاقشالاپ ايتتىم عوي قىزىمدى بەرمەيمىن دەپ!» - دەگەن ول ءنازيرانىڭ باسىنداعى ورامالدى جۇلىپ الىپ لاقتىرىپ جىبەرىپتى. قىزىنىڭ: «وسى ۇيدەن كەتپەيمىن. ەرلاندى جاقسى كورەمىن»، - دەپ ەڭىرەپ جىلاعانىنا قارامايدى. ۇرىپ-سوعىپ، اۋىلىنا اكەتىپ قالادى.
«ءنازيراعا وبال بولدى. وبالىنا قالدىم-اۋ! اتا-اناسىنىڭ ونداي ادامدار ەكەنىن قايدان بىلەيىن؟..» - دەگەن ەرلاننىڭ كوزىنەن جاس شىعىپ كەتتى...
قىسقاسى، اتا-اناسى تويعا دايىندالىپ قويعان ەرلانعا سول كۇنى اياق استىنان بىرەۋدى الىپ كەلۋ كەرەك بولىپتى. «ەكى-ءۇش كۇننىڭ ىشىندە تۇرمىسقا شىعاتىن قىز» ىزدەۋ سودان باستالعان ەكەن»، - دەپ جازادى وقيعا كۋاگەرى.
«بۇل جەردە مەن اكەنىڭ ءوز قىزىنىڭ تاعدىرىنا سونشالىقتى قاتىگەزدىكپەن قاراعانىنا تاڭمىن. پەرزەنتىنىڭ كوز جاسى سەلت ەتكىزبەگەن ول كىسىنىڭ سونداعى ارمانى نە ەكەن؟ باي جەرمەن قۇدا بولعىسى كەلدى مە؟ ولاي دەيىن دەسەڭ، ەرلاننىڭ وتباسى دا جەرگە قاراپ وتىرعان جوق، ءبىر اۋىلعا بەدەلى بار وتباسى ەكەن. قالاي بولعاندا دا ەكى جاستىڭ جۇرەگىنە جارا ءتۇستى. وعان قىز اتا-اناسىنىڭ سەبەپكەر بولعانى وكىنىشتى»، - دەپ تۇيىندەيدى اۆتور.