رامازان ايىنا وراي تەگىن قىزمەت كورسەتەتىن تاكسيلەر پايدا بولدى
16:45, 27 - مامىر 2017
شىمكەنت. قازاقپارات - وڭتۇستىك قازاقستان وبلىسىندا رامازان ايىنىڭ باستالۋىنا وراي تاكسيلەر تەگىن قىزمەت كورسەتەتىن تاكسيلەر پايدا بولدى.
وتىرار اۋدانىندا تاڭەرتەڭنەن بەرى 4 كولىك جولاۋشىلاردى تەگىن تاسىمالداۋدا. جاعىمدى اقپاراتتى جەرگىلىكتى تۇرعىن ەركەعالي تاڭاتاروۆ فەيسبۋك الەۋمەتتىك جەلىسىندە جاريا ەتكەن، دەپ حابارلايدى قازاقپارات ح ا ا ءتىلشىسى. «بۇگىن وتىراردا رامازان ايىنىڭ باستالۋىنا وراي تۇسكە دەيىن «تەگىن تاكسي» قىزمەت ەتەدى. وسى ساۋاپتى ىسكە اتسالىسقان بارشا جاندارعا اللانىڭ رازىلىعى جاۋسىن دەپ، ۇيىمداستىرۋشىلار اكسياعا قوسىلام دەۋشىلەر بولسا ورتالىق «ارىستانباب» مەشىتىنە كەلسە بولاتىنىن حابارلايدى» ، - دەيدى ەركەعالي تاڭاتاروۆ.
ال، جەلىگە جۇكتەلگەن سۋرەتتەردە كولىكتەرگە «و ق و «ارىستانباب» مەشىتىنىڭ جاستار ءىسى وكىلدىگى» دەگەن جازۋلارى بار پلاكاتتار ىلىنگەن. ياعني، بۇل باستامانى اتالعان مەشىتتىڭ قىزمەتكەرلەرى قولعا الىپ وتىر ەكەن
اۆتور: اينۇر اقبايەۆا