قازاقستاننىڭ باسىم بولىگىندە جەل كۇشەيىپ، داۋىل تۇرادى

استانا. قازاقپارات - قازاقستاننىڭ باسىم بولىگىندە اتموسفەرالىق اعىنداردىڭ وتۋىنە بايلانىستى 27 مامىردا اۋا رايى تۇراقسىز بولادى، دەپ حابارلادى قازگيدرومەت.

كوپتەگەن ايماقتاردا كۇن كۇركىرەپ، جاڭبىر جاۋادى. سولتۇستىك باتىستا جاۋىن بولىپ، جەل كۇشەيەدى. وڭتۇستىكتە شاڭدى داۋىل، سولتۇستىك پەن سولتۇستىك باتىستا تۇمان بولادى. قوستاناي، سولتۇستىك قازاقستان وبلىستارىنىڭ كەي جەرلەرىندە تۇمان ءتۇسىپ، كۇندىز جەل 15-20 م/س- قا كۇشەيەدى.  قىزىلوردا وبلىسىنىڭ كەي وڭىرىندە شاڭدى داۋىل تۇرىپ، جەل 15-20 م/س- قا دەيىن كۇشەيەدى. اقتوبە، وڭتۇستىك قازاقستان، تاڭ اتا جانە كۇندىز جامبىل وبلىسىندا، كۇندىز اقمولا، پاۆلودار، قاراعاندى وبلىستارىندا جەل 15-20 م/س- قا كۇشەيەدى.

 شىعىس قازاقستان وبلىسىنىڭ سولتۇستىگىندە تۇندە 2 گرادۋس ۇسىك جۇرەدى. اقمولا، قاراعاندى، شىعىس قازاقستان وبلىستارىندا توتەنشە ءورت قاۋىپى ساقتالادى.