يمام: ورازانى تەك ارىقتاۋ ءۇشىن ۇستاۋ ورەسكەل قاتە
ءدىنىمىز يسلامنىڭ بەس پارىزىنىڭ ءبىرى - رامازان ايىندا ورازا ۇستاۋ.
ءبىز ورازانى قاندايدا ءبىر ماتەريالدىق پايدانى كۇيتتەپ، نەمەسە تەك قانا دەنساۋلىعىمىزدىڭ جاقسارۋى ءۇشىن ۇستامايمىز. ەڭ اۋەلى اللانىڭ ءامىرى بولعاندىعى ءۇشىن جانە ونىڭ رازىلىعىنا بولەنۋ ءۇشىن ۇستايمىز. ورازا وسى نيەتپەن ۇستالعاندا عانا قابىل بولماق.
ورازا كۇنالاردان تازارتادى
ورازا - ءناپسىنىڭ (ەگو) تويىمسىزدىعىنان تۋىندايتىن ازعىندىقتان، ونىڭ جامانشىلىعىنان ساقتايتىن جانە كۇنالارىمىزدىڭ كەشىرىلۋىنە بىردەن- ءبىر سەبەپكەر بولاتىن ماڭىزدى قۇلشىلىقتىڭ ءتۇرى.
توزاق - كاپىرلەردىڭ ءھام كۇناھارلاردىڭ مەكەنى ەكەندىگى بەلگىلى. ولاي بولسا، اللانىڭ رازىلىعىن كۇيتتەپ ورازا ۇستاعان پەندە، اللانىڭ قالاۋىمەن توزاقتان امان قالىپ، ءجانناتقا كىرەدى.
ورازا - دەنساۋلىق كەپىلى
اللا تاعالا ادامزاتقا زياندى نارسەلەردى ءامىر ەتپەيتىندىگى بەسەنەدەن بەلگىلى. وسىدان 14 عاسىر بۇرىن ارداقتى پايعامبارىمىز: «ورازا ۇستاڭدار، دەنساۋلىقتارىڭ جاقسى بولادى» دەگەن بولاتىن. قازىر ءتىپتى مۇسىلمان ەمەس مەديتسينا سالاسىنىڭ عالىمدارى دا وسى ءبىر اقيقاتتى مويىنداپ، ادامداردى اشىعۋ جولدارىمەن ەمدەۋ ءۇشىن سان ءتۇرلى كلينيكالار اشۋدا. بۇل ورازا ۇستاۋدىڭ قانشالىقتى دەنساۋلىققا پايدالى ەكەندىگىن كورسەتەدى. ورازا، ياعني اشىعۋ قانت اۋرۋىنا توسقاۋىل بولىپ، قاننىڭ قويۋلانۋىنىڭ الدىن الادى. اشىعۋ ارقىلى جاڭا جاسۋشالار پايدا بولىپ، ەسكىلەرى جويىلادى.
الايدا، كەيبىر مۇسىلماندار ورەسكەل قاتەلىككە بارىپ، ورازانى تەك ارىقتاۋ ءۇشىن نەمەسە دەنساۋلىعىم جاقسارسىن دەپ ۇستاۋى دۇرىس ەمەس. نەگە و باستان نيەتىڭىزدى تۇزەپ، جالعىز اللانىڭ رازىلى ءۇشىن، پارىز بولعاندىعى ءۇشىن دەپ ورازا ۇستاماسقا. سوندا اللانىڭ رازىلىعىن دا الادى، دەننىڭ ساۋلىعى دا ساقتالادى.