اۋىل شارۋاشىلىعى مينيسترلىگى ەت باعاسىنىڭ وسۋىنە تۇسىنىك بەردى
بۇگىن ۇكىمەتتە وتكەن باسپا ءسوز ءماسليحاتىندا ق ر اۋىل شارۋاشىلىعى ءبىرىنشى ۆيتسە- ءمينيسترى قايرات ايتۋعانوۆ وسىلاي ءمالىم ەتتى، دەپ حابارلايدى قازاقپارات. باسپا ءسوز ءماسليحاتى بارىسىندا تىلشىلەر تاراپىنان ەلىمىزدىڭ وڭىرلەرىندە ەتتىڭ باعاسى قىمباتتاعانى ايتىلىپ، بۇعان نە سەبەپ بولعاندىعى تۋرالى سۇراق قويىلدى.
«باعا وسسە (اۋىل شارۋاشىلىعى ونىمدەرىنە)، مينيسترىلىكتى جانە اۋىل شارۋاشىلىعى تاۋارلارىن وندىرۋشىلەردى بۇل جاعداي قۋانتادى. سەبەبى شارۋالار ءونىم وندىرەتىندەر تاۋارلارىن قىمباتتىراق وتكىزۋگە مۇمكىندىك الادى. اتاپ ايتقاندا، باعا بويىنشا وڭىرلەردە ءارالۋاندىق بايقالادى، بۇگىندە باعالارعا كۇندەلىكتى مونيتورينگ ءجۇرىپ جاتىر»، - دەپ توقتالدى ول. ايتۋعانوۆتىڭ سوزىنە قاراعاندا، كوكتەم مەزگىلىندە جاپپاي ءتورت تۇلىك مالدىڭ تولدەۋى ءجۇرىپ جاتقاندىقتان، ەتتىڭ كولەمى ءبىرشاما تومەندەيدى.
سوندىقتان باعانىڭ ماۋسىمدىق ءوسىمى ورىن الىپ وتىر. بۇدان بولەك، تىلشىلەر قازاقستاننىڭ اۋسىلدان تازا ەل مارتەبەسىن الۋىنا وراي ەت ەكسپورتىنىڭ ارتۋى ىشكى نارىقتاعى باعانىڭ وسىمىنە قانشالىق اسەر ەتەتىندىگىن سۇرادى. ءوز كەزەگىندە ءبىرىنشى ۆيتسە-مينيستر ءونىم ەكسپورتى ارتسا، ىشكى نارىقتا باعانىڭ جوعارىلاۋىن ەشكىم جوققا شاعارمايتىنىن جەتكىزدى. ياعني، بۇل رەتتە ەكسپورت تۇراقتى بولسا، باعانىڭ وسەتىندىگى تۋرالى بولجام بار. سەبەبى اۋىل شارۋاشىلىعى تاۋار وندىرۋشىلەرىنە ءتيىمدى باعامەن ءوندىرۋ قولايلى.
اۆتور: رۋسلان عابباسوۆ