قاراعاندى وبلىسىنىڭ اكىمى: مەن دە اۋىلدىق مەكتەپتە وقىعانمىن
بيىل وقۋ ورداسىنان 12 وقۋشى تۇلەپ ۇشتى. ولاردىڭ تورتەۋى «التىن بەلگى»، ال ەكەۋى - ەرەكشە ۇلگىلى اتتەستات الۋعا ءۇمىتتى. ايماق باسشىسى تۇلەكتەرگە جىلى لەبىزدەرىن ءبىلدىردى. بۇل تۋرالى اكىمدىكتىڭ باسپا ءسوز قىزمەتىنەن حابارلادى. «بۇل كۇن شىنىمەن دە تولعاندىرار ساتكە تولى.
مەن ءوزىم دە وسى سەكىلدى اۋىلدىق مەكتەپتە وقىعانمىن. سوندىقتان سىزدەردىڭ سەزىمدەرىڭىز ماعان تانىس. ارينە، سىزدەر ءۇشىن بۇل ۇلكەن قۋانىش. ەرتەڭگى كۇننەن باستاپ جاڭا ءومىر جولىنا قادام باساسىزدار. الدا ءالى دە باعىندىرار بيىكتەرىڭىز كوپ بولادى. مەن سىزدەرگە سول جولدا ساتتىلىك تىلەيمىن. ەلباسى سىزدەردىڭ جارقىن بولاشاقتارىڭىز ءۇشىن كوپ جاعداي جاسادى. ءبىلىمىن جەتىلدىرەمىن دەۋشىلەر ءۇشىن الەمدىك دەڭگەيدەگى ۋنيۆەرسيتەتتەرگە ارنالعان «بولاشاق» باعدارلاماسىنىڭ ستيپەندياسى قاراستىرىلعان. ال جۇمىس ىستەيمىن دەگەندەرگە مەملەكەتتىك قولداۋ مەن ماماندىقتاردىڭ كەڭ تاڭداۋى بار. سىزدەر ءوز بولاشاقتارىڭىزدى وزدەرىڭىز قۇراسىزدار. سىزدەردىڭ تاڭداۋلارىڭىز ەلىمىزدىڭ بولاشاعىن كوركەيتۋگە سەپتىگىن تيگىزەدى»، - دەدى ە. قوشانوۆ.
وبلىس اكىمىنە اۋىل وقۋشىلارىنىڭ قانداي جاعدايدا ءبىلىم الاتىنى كورسەتىلدى. مەكتەپ ديرەكتورى نۇريتدەن ومىربايەۆ ايماق باسشىلىعىنا ەكسكۋرسيا وتكىزدى.
«بىزدە ءوزىمىزدىڭ كەنتتەگى وقۋشىلارمەن قاتار، جاقىن ماڭايداعى 6 ەلدى مەكەننىڭ از قامتىلعان مەكتەپتەرىنىڭ وقۋشىلارى كەلىپ وقيدى. ول وقۋشىلار ءبىزدىڭ مەكتەپتە ەمتيحان تاپسىرادى، وزدەرىندە وقىتىلمايتىن پاندەر بويىنشا ساباقتارعا قاتىسادى. كەلىپ- كەتىپ وقيتىن بالالار ءۇشىن 60 ورىندىق ينتەرنات بار. ال جالپى ءبىزدىڭ تىرەك مەكتەبىمىزدە 360 وقۋشى ءبىلىم الادى. از قامتىلعان مەكتەپتەردىڭ وقۋشىلارىمەن قوسقاندا - 720 ادام. سونداي- اق ءۇش جاستان باستاپ تاربيەلەنەتىن شاعىن ورتالىعىمىز بار»، - دەپ اتاپ ءوتتى مەكتەپ ديرەكتورى.
سونىمەن قاتار ەرلان قوشانوۆقا روستوۆ مەكتەبىنىڭ پەداگوگتارى ءبىلىم بەرۋ تاجىريبەسىندە جاڭا ادىستەردى قولدانىپ جاتقانى تۋرالى ايتىلدى. مۇعالىمدەر بالالاردىڭ فۋنكتسيونالدى ساۋاتتىلىعىن، عىلىمعا، سپورتقا جانە شىعارماشىلىققا دەگەن قىزىعۋشىلىعىن ارتتىرۋدى قولعا العان. مەكتەپتىڭ جانىندا ءۇش جىلىجاي بار. ونىڭ ەكەۋى - جازعى، بىرەۋى قىسقى. وقۋشىلار وندا كوكونىستەر مەن اسكوك وسىرەدى ەكەن. ادەتتە، جيناعان ءونىم مەكتەپ اسحاناسىنىڭ ازىق- تۇلىك قورىنىڭ تورتتەن ءبىر بولىگىن جابادى. تاعى ءبىر ەرەكشە كوڭىل تارتار نىسان - مەكتەپ- ينتەرناتتىڭ جەرتولەسىندە ورنالاسقان مۇراجاي بولدى. ونىڭ نەگىزى 2016 -جىلى قالانعان ەكەن. ءبىر جىل ارالىعىندا ول وبلىس بويىنشا ەڭ ۇزدىك مۇراجاي كەشەنى اتانىپ ۇلگەردى.
«ءبىزدىڭ مۇراجايىمىزدا جەتى زال بار، - دەپ ءتۇسىندىردى مەكتەپ ديرەكتورى نۇريتدەن ومىربايەۆ. - ەكسپوزيتسيامىز تاس داۋىرىنەن باستالادى. مۇندا بولمەنىڭ ءوزى ۇڭگىر ىسپەتتەس جاسالعان. وندا مامونتتاردىڭ ءمۇيىزى بار. ودان ارى قاراي وتسەڭىز، ورتا عاسىر، جەلتوقسان وقيعالارىنا، ۇلى وتان سوعىسىنا جانە باسقا دا ەلەۋلى تاريحي جايتتارعا قاتىستى زالدار بار. مۇراجاي نەگىزىندە تاريح، بيولوگيا، ءتىپتى فيزيكا مەن حيميا پاندەرىنىڭ ساباقتارى وتەدى. ەستەرىڭىزگە سالا كەتەيىك، بۇگىن ەلىمىز بويىنشا بارلىق مەكتەپتەردە سوڭعى قوڭىراۋ سىڭعىرلادى. قاراعاندى وبلىسىندا 481 مەكتەپتەن 7537 تۇلەك ۇلكەن ومىرگە قادام باستى.