استانا مەشىتتەرىندە ءبىر اي بويى اۋىزاشار بەرىلەدى
بۇل تۋرالى Sputnik قازاقستان حابارلايدى.
«قالا مەشىتتەرىنىڭ بارلىعىندا كۇندەلىكتى بۇقارا حالىققا، جاماعاتقا، قالا قوناقتارىندا الدىن الا تالون تاراتۋ ارقىلى تەگىن اۋىزاشارلار بەرىلەدى. سەگىز مەشىتتە شاما- شارقىنا قاراي اي بويى اۋىزاشارلار ۇيىمداستىرىلادى. بارلىعى كۇندەلىكتى 1670 ادامعا اۋىزاشار بەرىلەدى. مۇنىڭ ءبارى قايىرىمدىلىق شارالارى، حالقىمىزدىڭ، ەلىمىزدىڭ قولداۋىمەن، كومەگىمەن اتقارىلاتىن بولادى»، - دەدى رامازان ايىنا دايىندىققا ارنالعان باسپا ءسوز ءماسليحاتىندا قازاستان مۇسىلماندارى ءدىني باسقارماسىنىڭ نايب ءمۇفتيى، استانا قالاسىنىڭ باس يمامى ناۋرىزباي قاجى تاعان ۇلى.
بۇدان بولەك، قاسيەتتى قادىر تۇنىندە بارلىق مەشىتتە 10 مىڭنان استام ادامعا سارەسى بەرىلەدى.
نايب ءمۇفتيدىڭ ايتۋىنشا، رامازان ايىندا مەشىتتەردە قۇران كارىم ناماز ۇستىندە تولىق جاتقا وقىلاتىن بولادى.
«ەل ىشىندە حاتىم دەپ ايتادى، ياعني قاسيەتتى قۇراندى باسىنان اياعىنا دەيىن اي بويى بۇكىل سەگىز مەشىتتە وقىپ شىعادى. بۇل تاراۋىقتى جۇرگىزۋ ءۇشىن ەلىمىزدەگى قۇراندى جاتقا بىلەتىن قاريلارىمىزدى تارتتىق جانە شەتەلدىك قاريلەر دە بيىلعى جىلى مەشىتتەرىمىزدە حاتىم وقۋعا قاتىساتىن بولادى. قازاسقتان مۇسىلماندارى ءدىني باسقارماسى مەن تۇركيا ءدىن ىستەرى باسقارماسى اراسىندا ىنتىماقتاستىق تۋرالى كەلىسىم بار. سونىڭ اياسىندا تۇركيادان بىرنەشە قاري ەلىمىزگە كەلەدى. ءبىر قاري استانا قالاسىنداعى مەشىتتە حاتىم وقيدى»، - دەدى ناۋرىزباي قاجى تاعان ۇلى.
استانا قالاسى بويىنشا ەڭ ۇزاق ورازا 24 - ماۋسىمعا، ياعني سوڭعى كۇنگە كەلەدى ەكەن. ونىڭ ۋاقىتى - 18 ساعات 37 مينۋت.
«جالپى، شامامەن ورتاشا الاتىن بولساق، ورازا بارىسىندا جاماعات 18 ساعات كولەمىندە اۋىز بەكىتەتىن بولادى»، - دەدى نايب ءمۇفتي.
بيىلعى جىلى ءپىتىر ساداقا مولشەرى ءار ادامعا 300 تەڭگە كولەمىندە بەكىتىلىپ وتىر. ءپىتىر ساداقانى رامازان ايىنىڭ باستالۋىنان ايت نامازىنا دەيىن بەرۋگە بولادى.
«ءپىتىر ساداقا مولشەرى ءبيدايدىڭ باعاسىنان الىنادى. شاريعاتتا ءبيدايدان جارتى ساق، ياعني 1 ك گ 625 گرامم كولەمىندەگى ءبيدايدىڭ قۇنىمەن ەسەپتەلەدى. ءپىتىر ساداقانى باسقا دا ونىمدەردەن بەرۋگە بولادى، مىسالى، قۇرما، مەيىز، ارپا. بۇل شاريعاتتا ءبىر ساق دەپ ەسەپتەلگەن. قازىرگى ولشەممەن الاتىن بولساق، 3 ك گ 25 گرامدى قۇرايدى. كەبىر ادامدار ءپىتىر ساداقانى قۇرمامەن نەمەسە مەيىزبەن بەرەمىن دەسە، ءوز ەركىندە»، - دەپ اتاپ ءوتتى ناۋرىزباي قاجى تاعان ۇلى.
ايتا كەتەيىك، بيىل رامازان ايىنىڭ العاشقى كۇنى 27 - مامىرعا تۋرا كەلىپ وتىر. ورازا بيىل 29 كۇنگە سوزىلادى. قاسيەتتى قادىر ءتۇنى ماۋسىمنىڭ 21 نەن 22 سنە قاراعان ءتۇن. ورازا ايت مەرەكەلەرى - 25, 26, 27 - ماۋسىم.