قازاقستاندا كيىكتەر تاۋلىك بويى كۇزەتىلۋدە - اسقار مىرزاحمەتوۆ
«كيىكتەردىڭ جاپپاي قىرىلۋى ورىن العاننان كەيىن ءبىز وسى جانۋارلاردى قورعاۋ ءتاسىلىن قايتا قاراستىردىق. سوڭعى ساناقتىڭ مالىمەتتەرى وكەن جىلعا تيەسىلى، ال بيىل ساناق ساۋىردە وتكەندىكتەن، ونىڭ قورىتىندىسى ءالى شىعارىلعان جوق. جيناقتالعان مالىمەتتەر وڭدەلىپ جاتىر. بىلتىرعى ساناقتىڭ قورىتىندىسى بويىنشا 108 مىڭنان استام كيىك بار، ونىڭ باسىم بولىگى ورال تارالىمىندا، ودان كەيىن بەتپاقدالا پوپۋلياتسياسى بار. ال ءۇستىرت تارالىمىدا كيىك الدەقايدا ازايعان»، - دەدى مىرزاحمەتوۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وسىمدىكتەر مەن جانۋارلار دۇنيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا تالقىلاۋ بارىسىندا.
ونىڭ سوزىنە قاراعاندا، كيىكتەر سانىنىڭ ازايۋىنا، سونىمەن قاتار ولاردىڭ شاعىن توپتارعا ءبولىنىپ كەتۋىنە بايلانىستى قورعاۋ تاسىلدەرىن قايتا قاراۋعا تۋرا كەلدى. وسى ورايدا «وحوتزووپرومنىڭ» مۇمكىندىكتەرى كۇشەيتىلدى. بۇگىندە بۇل مەكەمەدە 200-دەن استام ينسپەكتور جۇمىس ىستەيتىن بولسا، سونىڭ 160-قا جۋىعى كيىكتەردى قورعاۋعا جۇمىلدىرىلدى. بۇل رەتتە جانۋارلاردى تاۋلىك بويى كۇزەتۋ ءتارتىبى ىسكە اسىرىلۋدا.
«كيىكتەردى قورعاۋعا عالىمداردى دا تارتۋدامىز. ولاردىڭ بەرگەن ۇسىنىستارىن ەسكەرە وتىرىپ، اتقارىلىپ جاتقان شارالار جانۋارلاردىڭ سانىن كوبەيتۋگە ىقپال ەتەدى دەپ ويلايمىز. بيىلعى ساناقتىڭ ناقتى قورىتىندىسى شىعارىلعان جوق، الايدا كيىكتەردىڭ سانى بىلتىرعا قاراعاندا ارتقانىن بايقاۋدامىز»، - دەپ تۇيىندەدى ءسوزىن مىرزاحمەتوۆ.
ەسكە سالساق، 2015 -جىلى ءۇش وڭىردە 134 مىڭ كيىك قىرىلدى. 2013 -جىلى قوستاناي، اقتوبە، اقمولا وبلىستارىندا پاستەرەللەزدەن - 1,5 مىڭ، 2012 -جىلى - 1 مىڭ، 2010 -جىلى 12 مىڭعا جۋىق كيىك قىرىلدى.
اۆتور: رۋسلان عابباسوۆ