استانادا قانداي ماماندىقتارعا سۇرانىس جوعارى؟
حابارلامادا «الدىن الا بولجامعا سايكەس، ەلوردا الداعى جىلدارى مىناداي ماماندىقتاردى قاجەت ەتەدى: ساۋدا، قارجى - 294 ادام، قىزمەت كورسەتۋ - 645، دەنساۋلىق ساقتاۋ - 415، قۇرىلىس - 330، ءبىلىم سالاسى - 437، اقپارات جانە بايلانىس - 224، قۇرىلىس جانە كوممۋنالدىق شارۋاشىلىق - 435 ادام»، - دەلىنگەن.
مەكتەپ بىتىرۋشىلەر اراسىنان ەرەكشە تالاپ ەتىلگەن ماماندىقتار دا ەسكەرىلگەن: اسپازشى، اۆتوكولىك جوندەيتىن سلەسار، بايلانىس مونتاجداۋشىسى - كابەلشى، ليفت ەلەكترومەحانيگى، شاشتاراز - سانگەر، داياشى.
ەلوردانى دامىتۋ ماقساتىندا قالالىق كوللەدجدەردە جاڭا ماماندىقتار اشۋ ءىسى جوسپارلانىپ وتىر: «تەحنيكالىق قىزمەت كورسەتۋ، اۆتوكولىك جوندەۋ جانە ەكسپلۋاتاتسيا ماماندىعى بويىنشا مەحاترونيك»، «كوپىرلەر جانە كولىكتىك توننەل»، «ەلەكتر ستانسالارى مەن جۇيەلەرىندەگى ەلەكتر جابدىعى»، «وندىرىستەگى ەلەكترومەحانيكالىق جابدىقتار»، «مەديتسينا تەحنيكاسىن جوندەۋ، مونتاجداۋ جانە تەحنيكالىق قىزمەت»، «كىتاپحانا ءىسى».