اكىم ساپاربايەۆ فۋتبولشىلارعا: جىگىتتەردە نامىس بولۋى كەرەك
«اقتوبە» فۋتبول كلۋبىنا باس باپكەر بولىپ ۆلاديمير مۋحانوۆ تاعايىندالىپ، بۇگىن ول كومانداعا تانىستىرىلدى. وبلىس اكىمى بەردىبەك ساپاربايەۆ فۋتبولداعى جاعدايدىڭ قيىن ەكەنىن ايتىپ، ويىنشىلاردى ءبىر وتباسىنىڭ بالاسىنداي جۇمىلۋعا شاقىردى.
«اقتوبە» فۋتبول كلۋبىن دامىتۋ ءۇشىن كوپ ادام ۆلاديمير مۋحانوۆتى قايتارۋدى سۇرادى. ول باس باپكەر بولعان كەزدە كوماندا قازاقستان چەمپيونى، سۋپەر كۋبوك يەگەرى بولىپ، ەۋروپا ليگاسى ويىندارىنا قاتىستى. سوندىقتان ۆلاديمير مۋحانوۆقا ءوتىنىش جاسادىق. وتكەن اپتادا جەكە كەزدەسۋ ءوتىپ، كەلىسسوز ءجۇردى، ول كەلىستى.
قازىر كلۋبتىڭ جاعدايى جاقسى ەمەس، ءبىراق شەشىمى تابىلادى. الدا ءالى 10 ويىن بار. ونىڭ تورتەۋى سىرت الاڭدا وتەدى. «قايرات»، «استانا»، «ورداباسى» سەكىلدى مىقتى كوماندالارمەن اراداعى ويىن ءبىزدىڭ ورتالىق ستاديوندا وتەتىنىن ەسكەرسەك، جاعدايدى دۇرىستاۋعا مۇمكىندىك بار. ايتا كەتەرلىگى، كومانداداعى مورالدىق- پسيحولوگيالىق جاعداي دۇرىس بولۋى كەرەك. قازىر ونداي جوق. بۇرىنعى باس باپكەر راحايەۆتىڭ ءوزى ۇناتاتىن ويىنشىلارى بولعان. سپورتتا سۇيىكتى ويىنشىلار بولماۋى كەرەك»، - دەدى اقتوبە وبلىسىنىڭ اكىمى بەردىبەك ساپاربايەۆ. سپورتشىلارمەن كەزدەسۋ ءارى باس باپكەردى تانىستىرۋ كەزىندە ءوڭىر باسشىسى جىگىتتەردە نامىس بولۋى كەرەكتىگىن قايتالاپ ايتتى.
كەي ويىنشىلاردى ورنىنان تۇرعىزىپ، الاڭداعى كورسەتكىشتەرىن سىنادى.
«ءبىز ەشكىمگە ەشقانداي ۋادە بەرمەيمىز. جۇمىس ىستەسەڭدەر، جالاقى الاسىڭدار، جۇمىس ىستەمەسەڭدەر، جالاقى المايسىڭدار. لەگيونەرلەرگە جەتكىزۋ كەرەك. ولاردى ءبىزدىڭ جاستار تاجىريبە جيناسىن، ءوز بىلگەنىمەن ءبولىسسىن دەپ شاقىردىق. تەك ويناپ كەتپەسىن. تالاپ مىقتى بولادى. ءبىر وتباسىداي جۇمىس ىستەيىك. ءبىز ءوز ۋادەمىزدى ورىندايمىز، سەندەر دە ۋادەدە تۇرىڭدار. جاعدايدى جاقسارتۋ ءۇشىن بار كۇشتەرىڭدى سالىڭدار»، - دەدى ب. ساپاربايەۆ.
ايتا كەتەيىك، 13 -ماۋسىمدا كەزەكتى ترانسفەر اشىلادى. جەرگىلىكتى اكىمدىك باس باپكەر ۆلاديمير مۋحانوۆقا شەكتەۋ قويمايتىندارىن، بۇرىنعى ويىنشىلاردى كومانداعا قايتارۋ كەلىسىمى ءجۇرىپ جاتقانىن جەتكىزدى.
«كوماندادا 25 ويىنشى بولسا، ونىڭ 11 ى جەرگىلىكتى فۋتبولشى ەكەن. ءبىراق ولاردىڭ الاڭدا جۇرگەنىن كورمەيسىن. ەڭ بولماسا 10-15 مينۋتقا شىعارۋ كەرەك. ولاي بولماسا جەرگىلىكتى فۋتبولشىلاردى تاربيەلەي المايمىز»، - دەدى ب. ساپاربايەۆ.
اۆتور: التىناي ساعىندىقوۆا