ديماشتىڭ كونسەرتىنە حۋنان ت ۆ ارناسى ءوز جۇلدىزدارىن الىپ كەلەدى - مينيستر

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ ايتۋىنشا، استانادا وتەتىن ديماش قۇدايبەرگەننىڭ كونسەرتىندە باسقا دا تانىمال ەسترادا جۇلدىزدارى ونەر كورسەتەدى، دەپ حابارلايدى قازاقپارات ءتىلشىسى.

«ءبىز قىتايلىق Hunan TV ارناسىمەن كەلىسىمشارتتى راسىمدەدىك. شوۋ وتە قىزىقتى بولادى. سەبەبى وعان ۇزدىك رەجيسسەرلەر تارتىلۋدا. قازىرگى كەزدە ءبىز ەسترادالىق- سيمفونيالىق وركەستردى جاساقتادىق. ديريجەردى دە انىقتاپ قويدىق. ال ديماشپەن بىرگە ءان ايتاتىن ارتىستەر تۋرالى ازىرگە ەشتەڭە ايتا المايمىن. ويتكەنى كەلىسىمشارت تالاپتارى ناقتىلانۋدا»، - دەدى مۇحامەدي ۇلى بۇگىن جۋرناليستەرگە بەرگەن سۇحباتىندا.

ءمينيستردىڭ ايتۋىنشا، ديماش قۇدايبەرگەننىڭ گونورارى از بولمايدى. «انشىلەردىڭ گونورارلارى تۋرالى ايتار بولسام، ولاردىڭ دەڭگەيلەرىنە قاراي گونورار كولەمى بەلگىلەنەدى. ماسەلەن، باس ءانشىسىنىڭ گونورارى دەڭگەيىنە سايكەس جوعارى بولادى. ديماشتىڭ گونورارى قانشا بولاتىندىعىن دا جاريا ەتە المايمىن. بۇل ءانشىنىڭ جەكە ماسەلەسى ەكەندىگىن بىلەسىزدەر. ديماش سياقتى جاس ءانشى ءۇشىن 30 مىڭ ورىندىق ستاديوندى تولتىرۋدىڭ ءوزى ۇلكەن جەتىستىك»، - دەپ اتاپ ايتتى مينيستر.

اۆتور: ارمان اسقاروۆ