پاۆلودار وبلىسىنىڭ اكىمى باياناۋىلدا اسپان استىنداعى مۇراجاي اشۋ يدەياسىن قولدادى
باياناۋىلعا جاساعان جۇمىس ساپارىنان كەيىن ايماق باسشىسى جينالىس وتكىزىپ، اۋداننىڭ تاريحي-مادەني مۇراسىن ساقتاۋ تۋرالى ماسەلە كوتەردى.
- تابيعاتى كوركەم، تاريحي قۇنىدىلىعى اسا ماڭىزدى جەرگە يەلىك ەتىپ وتىرعاندىقتان، ونى قاز-قالپىندا ساقتاۋىمىز كەرەك، - دەدى وبلىس اكىمى.
- باياناۋىلعا كەلگەن قوناقتار تاۋدا سەرۋەندەپ، كولدە شومىلىپ قانا قويماي، ولكەنىڭ باي تاريحى مەن مادەنيەتىمەن تانىسۋى ءۇشىن تۋريستەردىڭ اۋدانداعى رۋحاني ورىنداردى ارالاۋىنا جاعداي جاساۋىمىز كەرەك. سوندا عانا باياناۋىل برەندكە اينالادى. بولات باقاۋوۆ باياناۋىلدىڭ ماڭىزدى تاريحي جانە ارحەولوگيالىق ورىندارىن اباتتاندىرىپ، قورشاپ، ءۇش تىلدەگى اقپاراتتىق قالقاندارمەن جابدىقتاۋ قاجەت ەكەندىگىن ايتتى.
بۇدان بولەك، ول جەرلەرگە جولدار جاساپ، ارنايى كورسەتكىشتەر ورناتۋ كەرەك. ەستەرىڭىزگە سالا كەتەيىك، وتكەن دەمالىستا باياناۋىلدا جاڭا تۋريستىك مارشرۋتتىڭ تۇساۋكەسەرى وتكەن ەدى.
مارشرۋتتىڭ بويىندا جاياۋ جانە ات ۇستىندەگى ەكسكۋرسيالار ۇيىمداستىرىلىپ، قازاقتىڭ تۇڭعىش كينو رەجيسسەرى شاكەن ايمانوۆتىڭ تۋعان جەرى، ابىلاي حاننىڭ ورداسى، داناتاس جانە كەمپىرتاس جارتاستارى، حالىق اراسىندا «باياناۋىلدىق ستوۋنحەندج» اتانىپ كەتكەن «مۇرتتى قورعان» ارحەولوگيالىق ەسكەرتكىشى، قولا ءداۋىرىنىڭ قورىمدارى جانە باسقا دا ورىندارعا ساپارلاۋعا بولادى.