قازاقستان عالىمدارى جىلدام ءونىم بەرەتىن كارتوپ سورتىن دايىنداپ شىعاردى
تاۋلى دا جازىقتى، سۋلى دا نۋلى، اڭىزاق ءشولى دە كەزدەسەتىن ءبىزدىڭ وڭىرگە كەز كەلگەن وسىمدىك جەرسىنە بەرمەيدى. وسىنى ەسكەرگەن ۋنيۆەرسيەتتىڭ اعا وقىتۋشىسى، اۋىل شارۋاشىلىعى عىلىمىنىڭ كانديداتى گالينا كۋزمينا ولكە جاعدايىنا بەيىمدەلگەن، جاڭبىر مەن شولگە بىردەي ءتوزىمدى، جوعارى سۇرىپتى كارتوپ ءونىمىن زەرتتەپ، مەملەكەتتىك سۇرىپ سىناعىنا جىبەردى. ول تۋراسىندا زەرتتەۋ ورتالىعىنىڭ عىلىمي قىزمەتكەرى، بيولوگيا ماگيسترى اراي مۇراتحان قىزى بايانداپ بەردى.
- مەملەكەتتىك سۇرىپ سىناعىنا جىبەرگەن جوبانىڭ تاقىرىبى «شىعىس قازاقستان ايماعىندا ءوزىمىزدىڭ جانە ت م د ەلدەرىنىڭ سەلەكسياسىنىڭ ءتوزىمدى ءارى ونىمدىلىگى جوعارى كارتوپ سۇرىپتارىن ىرىكتەپ الۋ» . وسى جوبا بويىنشا ەرەكشە كوزگە تۇسكەن «ۋداچا» جانە «سانتە» اتتى ەكى سۇرىپتى اۋىل شارۋاشىلىعى مينيسترلىگىنە ۇسىندىق. سونداي- اق، 32 گيبريدتىڭ ىشىنەن تاڭدالعان «شىعىس» ، «يزولدا» ، «تاۆريا» اتتى ءۇش گيبريدكە دە سۇرىپ شەنىن بەرمەك ءۇشىن ۇسىنىس جاساپ وتىرمىز، - دەيدى عالىم.
جالپى ۋنيۆەرسيتەت كوللەكسياسىندا 60 قا جۋىق كارتوپ سۇرىبى بار. الداعى كۇندەرى وسى 60 سۇرىپتىڭ ىشىنەن 50 ءتۇپ كارتوپ وسكىنىن «ۇلان- جەمىس» شارۋاشىلىعىنا ەگۋ جوسپارلانعان. ال قالعان ونشاقتى سورت قالەمشەلەۋ ءادىسى جانە ميكروتۇينەكتەرىن الۋ ءادىسى ارقىلى قايتادان كوبەيتىلەدى.
- قازىر وڭىردە ەگىلەتىن كارتوپ تۇقىمدارىنىڭ كوبى گوللانديا، رەسەي، گەرمانيا سياقتى ەلدەردەن اكەلىنەدى. سولاردىڭ ورنىن جەرگىلىكتى تۇقىمدارمەن الماستىرۋ ماقساتىندا كارتوپ سۇرىپتارىن الۋعا نەگىزدەلگەن عىلىمي- زەرتتەۋ جۇمىستارىن جۇرگىزىپ كەلەمىز. ويتكەنى، شەت ەلدەن اكەلىنگەن كارتوپ سۇرىپتارى ءبىزدىڭ اۋماعىمىزدىڭ كليماتتىق جاعدايىنا بەيىمدەلمەگەن. سوندىقتان، بۇل شەتەلدىك سۇرىپتار كۇتىمى كەلسىپەگەن جاعدايدا ەكى- ءۇش جىل وتپەي جاتىپ ءوز ونىمدىلىكتەرىن جوعالتادى، - دەيدى اراي مۇراتحان قىزى.
جوبانىڭ ەرەكشەلىگى سول، اتالعان سۇرىپتار باس- اياعى 70-75 كۇننىڭ ىشىندە ءونىم بەرە الادى. مامىر ايىندا تىڭعا تۇرەن سالعان ديحان ەل تامىز ايىنىڭ باسىندا- اق كۇرەك- سايمانى مەن قانار- قابىن قامداي بەرسە بولادى.
دەرەككوز: kaz.altaynews.kz