كولىكتەرگە ەرەكشە نومىرلەر ساتۋدان قانشا اقشا ءتۇستى
ءمينيستردىڭ ايتۋىنشا، «ەلەكتروندى ۇكىمەت» پورتالى ارقىلى ميلليونداعان مەملەكەتتىك قىزمەت كورسەتىلدى. الداعى ۋاقىتتا كومپوزيتتىك (ءبىر قىزمەتتىڭ ىشىندە بىرنەشە قىزمەت - اۆت. ) جانە پرواكتيۆتى (بەلگىلى ءبىر قىزمەتتى الۋ قاجەتتىگى جايىندا الدىن الا ەسكەرتۋ - اۆت. ) قىزمەتتەردى دامىتۋ جۇمىسىنا باسىمدىق بەرىلمەكشى.
«كولىك جۇرگىزۋشىلەرىنە ارنالعان مامانداندىرىلعان حالىققا قىزمەت كورسەتۋ ورتالىقتارى دا جاقسى جۇمىس ىستەپ كەلەدى. وتكەن جىلى اتالعان ورتالىقتار 1,8 ميلليون رەت قىزمەت كورسەتتى. ال جوعارى سۇرانىسى بار مەملەكەتتىك تىركەۋ نومىرلەرىن ساتۋدىڭ ناتيجەسىندە بيۋدجەتكە 1,2 ميلليارد تەڭگە ءتۇستى»، - دەيدى ابايەۆ.
بۇدان بولەك، پوشتا ارقىلى قۇجات جەتكىزۋ جۇيەسى قولعا الىندى. ال موبيلدى توپتار شالعاي جەرلەرگە بارىپ، ءتيىستى قۇجاتتارعا تاپسىرىس الىپ جۇرەدى. «ارينە، ءبىز ءاربىر اۋداندا حالىققا قىزمەت كورسەتۋ ورتالىعىن اشا المايمىز. الايدا كەڭ جولاقتى ينتەرنەتتى ءاربىر اۋىلعا جەتكىزۋدىڭ ناتيجەسىندە جەرگىلىكتى حالىق ۇيدەن شىقپاي-اق، وزىنە قاجەتتى قۇجاتقا ءوزى تاپسىرىس بەرىپ، ونى پوشتامەن الدىرتا الادى»، - دەپ اتاپ كورسەتتى مينيستر.
اۆتور: ارمان اسقاروۆ