قازاقپارات سايتىنا ەڭ كوپ سىلتەمە جاسالدى - مينيستر ابايەۆ
ونىڭ ايتۋىنشا، ءبىر جىل ىشىندە اتقارىلعان جۇمىستار از ەمەس. الدا تۇرعان جوسپارلار دا جەتەرلىك، دەپ حابارلايدى قازاقپارات ءتىلشىسى. «ءبىز مەملەكەتتىك ورگاندار مەن ۇلتتىق كومپانيالاردىڭ اقپاراتتىق جۇمىسىنا قاتىستى ناقتى تالاپتاردى ەنگىزدىك. بارشاعا ورتاق مەدياجوسپار قابىلداندى. وندا ءاربىر مەملەكەتتىك ورگاننىڭ شارالارى كورسەتىلگەن. بۇدان بولەك، اقپارات سالاسىنداعى مەملەكەتتىك تاپسىرىستىڭ ءبىرىڭعاي ەرەجەلەرى بەكىتىلدى. نەگىزگى ماقسات - ول تاپسىرىستىڭ اشىقتىعىن قامتاماسىز ەتۋ»، - دەيدى مينيستر.
بۇدان بولەك، وتاندىق كينوعا ارنالعان «ەل ارنا» ىسكە قوسىلدى. Kazakh TV مەن «ءبىلىم جانە مادەنيەت» ارنالارى بىرىكتىرىلدى. سونىڭ ارقاسىندا ءبىراز اقشا ۇنەمدەلدى. ەسەسىنە كونتەنتتىڭ ساپاسى جوعارلادى. «قازسپورت»، «قازاقستان» مەن «حابار» ارنالارى HD فورماتقا اۋىستى. «24KZ« ارناسىنا رەبرەندينگ جاسالدى. «جالپى ايتقاندا، «قازاقستان»، «حابار» مەن «حابار24» ارنالارى ءبىر- بىرىنە باسەكەلەس بولماي، ءوز كورەرمەندەرىن تاباتىنداي جاعداي جاسادىق. وسى ۋاقىتقا دەيىن العاش رەت «تۇمار» ۇلتتىق تەلەۆيزيالىق سىيلىعى تابىستالدى. ەندى اقپارات پەن بايلانىس قىزمەتكەرلەرى كۇنىنە وراي، باسپا، راديو مەن ينتەرنەت جۋرناليستيكا سالاسىنداعى «ۇركەر» سىيلىعى تاپسىرىلادى»، - دەپ اتاپ كورسەتتى داۋرەن اسكەربەك ۇلى.
ءمينيستردىڭ سوزىنە قاراعاندا، وتاندىق سەريالداردىڭ ساپاسى دا جاقسارىپ كەلەدى. قازىرگى كەزدە قازاقستاندا تۇسىرىلگەن سەريالداردى رەسەي، قىتاي مەن قىرعىزستاننىڭ ارنالارى ءوز جەرىندە كورسەتىپ جاتىر.
«سونداي-اق ءبىز «كازاحستانسكايا پراۆدا» مەن «ەگەمەن قازاقستان» گازەتتەرىنىڭ ديزايىنىن وزگەرتتىك. اتالعان باسىلىمداردىڭ سايتتارى جاڭارتىلدى. «ادەبيەت پورتالى» پەن National Digital History» سايتىنا رەبرەندينگ جاسالدى. KazInform سايتى ءوز جۇمىسىن وزگەرتتى. وتكەن جىلى اتالعان سايتقا ەڭ كوپ سىلتەمە جاسالدى. سونداي-اق «سيفرلىق قازاقستان - 2020» باعدارلاماسىنىڭ وسى جىلعا ارنالعان بارلىق ماقسات- مىندەتتەرى الدىن الا ورىندالدى. حالىقتىڭ كومپيۋتەرلىك ساۋاتتىلىعى 76 پايىزدان استى. بارلىق ۇيلەردىڭ 84 پايىزدان استامى ينتەرنەتتى پايدالانادى.
بۇگىندە اقپاراتتىق تەحنولوگيالاردى پايدالانۋ جاعىنان قالا مەن اۋىلدىڭ اراسىندا ۇلكەن الشاقتىق بار. قالادا ينتەرنەت جىلدام ىستەيدى. سونىڭ ارقاسىندا ەلەكتروندى پورتال ارقىلى مەملەكەتتىك قىزمەتتەردى وڭاي الۋعا بولادى. اۋىلدا ولاي ەمەس. سوندىقتان ءبىز قالا مەن اۋىلدىڭ وسى ءبىر الشاقتىعىن ازايتۋ ماقساتىندا ارنايى جوبانى ۇسىنىپ وتىرمىز.
اتالعان باستاما جۇزەگە اسسا، ءۇش جىلدىڭ ىشىندە 1900 ەلدى مەكەندە جىلدام ءارى ساپالى ينتەرنەت بولادى. وسىلايشا، 4 ميلليون ادام كەڭ جولاقتى ينتەرنەتتى قولدانا باستايدى»، - دەدى د. ابايەۆ.
ايتا كەتكەن ءجون، ب ۇ ۇ مەن دۇنيەجۇزىلىك ەكونوميكالىق فورۋمنىڭ سوڭعى مالىمەتتەرىنە سايكەس، قازاقستان ەلەكتروندى ۇكىمەتتى دامىتۋ جاعىنان 33- ورىنعا كوتەرىلدى. ال جەلىلىك ينفراقۇرىلىم بويىنشا ءبىز 39- ورىندا تۇرمىز. بۇل - ت م د ەلدەرى ىشىندە ەڭ ۇزدىك كورسەتكىش. قوعامدىق كەڭەستىڭ بۇگىنگى وتىرىسىندا مينيسترلىكتىڭ جۇمىسى جوعارى باعالاندى. بۇدان بولەك، كەڭەستىڭ قۇرامىنا جاڭا مۇشەلەر قابىلداندى.
اۆتور: ارمان اسقاروۆ