قىتايداعى قازاق ستۋدەنتتەرى توعىزقۇمالاق ويىنىنىڭ ينتەرنەت نۇسقاسىن جاسادى - فوتو، كەسكىن
قىتاي ورتالىق تەلەارناسى رەسمي سايتىنىڭ مالىمەتىنشە، قىتايلىق ستۋدەنتتەر بۇل جوبانى توعىزقۇمالاق دەپ اتالاتىن ارنايى پورتالعا ورنالاستىرىپ، قىتايداعى ءداستۇرلى ستۋدەنتتەر كورمەسىندە ۇسىنعان.
توعىزقۇمالاقتى ينتەرنەت ارقىلى قازاق ، اعىلشىن جانە قىتاي تىلدەرىندە ەركىن ويناۋعا بولادى. ويىننىڭ ەرەجەلەر ءۇش تىلدە انىق تۇسىندىرىلگەن. اتالمىش باعدارلاما نۇسقاسىندا ويىن بارىسىندا كەڭەس ايماعىن قۇرىپ، ءوزارا پىكىر الماسۋىنا تولىق مۇمكىندىك جاسالعان. سونىمەن بىرگە باعدارلاماداعى ءار ۇپاي ساندارى، ويىنشىلاردىڭ جۇرىستەرى ويىن تاريحى رەتىندە جازىلىپ وتىرادى جانە وعان باعا بەرىلەدى.
«بەيجىڭ قالاسىندا ستۋدەنتتەر اراسىندا وتكەن ءداستۇرلى ونەرتاپقىشتار كورمەسىندە توعىزقۇمالاق ويىنىنىڭ ينتەرنەت جوباسى وزگە ۇلت وكىلدەرىنىڭ قاتتى قىزىعۋشىلىعىن تۋعىزدى. ولار بۇل ويىننىڭ ەرەجەسىن، جۇيەنىڭ مۇمكىندىگىن جوعارى باعالاپ داۋىس بەردى. ناتيجەسىندە كورمەگە ۇسىنىلعان 200 گە تارتا جوبانىڭ ىشىنەن توعىزقۇمالاق ينتەرنەت ويىنى جوباسى 2 - ورىندى جەڭىپ الدى. سونداي- اق جوبا « قىزىعۋشىلىق تۋدىرعان 10 ءىرى جوبا» اتالىمى بويىنشا ماراپاتتالدى» ، - دەپ جازادى cctv ورتالىق تەلەارناسى سايتىنىڭ ءتىلشىسى ەركەبۇلان ءمۇتان ۇلى
قىتايداعى ونەرتاپقىش قانداستارىمىزدان قۇرالعان توعىزقۇمالاق زەرتتەۋ ۇجىمى بۇل جوبانى ونان ءارى جەتىلدىرە تۇسپەك. سول ارقىلى ەجەلدەن كەلە جاتقان ۇلتتىق ويىنىمىزدى جاڭا زامانعا بەيىمدەپ، جاستاردىڭ ساناسىنا سىڭىرۋگە نيەتتى.
اۆتور: ريزابەك نۇسىپبەك ۇلى