قازاقستاندىقتار ۇشۋعا قويىلعان شەكتەۋدى اۋەجايدا الىپ تاستاي الادى
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا «ازاماتتار ءۇشىن ۇكىمەت» مەملەكەتتىك كورپوراتسياسىنىڭ باسقارما ءتوراعاسى ابىلايحان وسپانوۆ ءمالىم ەتتى، دەپ حابارلايدى قازاقپارات.
«ەنگىزىلگەلى وتىرعان تاعى ءبىر جاقسى جاڭالىق ۇشۋعا شەكتەۋ قويىلعان جاعدايدا ايىپپۇلدى وتەۋ ماسەلەسى بولماق. بۇگىنگى كۇنى ازاماتتار كەدەندىك باقىلاۋدان ءوتۋ بارىسىندا ولارعا ۇشۋعا شەكتەۋ قويىلعاندىعى تۋرالى اقپاراتتىڭ بەرىلىپ جاتاتىندىعىن بىلەمىز»، - دەپ اتاپ ءوتتى ول.
كورپوراتسيا باسشىسىنىڭ ايتۋىنشا، وسى ماسەلەنى شەشۋگە باعىتتالعان جۇمىستار بۇگىنگى كۇنى جۇرگىزىلىپ جاتىر.
«بۇگىنگى كۇنى ادىلەت مينيسترلىگىمەن جانە «قازپوشتا» ا ق- ىمەن بىرلەسىپ، بۇل ماسەلە تالقىلاندى. ماۋسىم ايىنان باستاپ ازاماتتار ايىپپۇلداردى ونلاين- رەجىمدە بىردەن تولەۋ مۇمكىندىگىن الادى جانە ۇشۋعا قويىلعان شەكتەۋ بىردەن الىنىپ تاستالادى. بۇل قىزمەت ءتۇرىن قازپوشتا وسى جىلدىڭ ماۋسىم ايىنان باستاپ ىسكە قوسۋدى جوسپارلاپ وتىر»، - دەدى ابىلايحان وسپانوۆ.
اۆتور: مارلان جيەمباي