جوعالىپ كەتكەن الماتىلىق قىزدىڭ تۋىستارى ونى ىزدەمەۋدى سۇراپ وتىر
15:35, 24 - مامىر 2017
استانا. قازاقپارات - الەۋمەتتىك جەلىلەر مەن مەسسەندجەرلەردە الماتى قالاسىنداعى قازاق باس ساۋلەت- قۇرىلىس اكادەمياسىنىڭ ستۋدەنتى مەرۋەرت عابيتوۆانىڭ جوعالىپ كەتكەنى تۋرالى حابارلاندىرۋ قايتا جارىق كوردى.
بۇل تۋرالى Sputnik قازاقستان حابارلايدى.
قىزدىڭ تۋعان-تۋىستارىنىڭ سوزىنە سۇيەنسەك، ول ۇيىندە ەكەن، سول سەبەپتى بۇل اقپاراتتى تاراتۋدىڭ قاجەتى جوق.
بۇل جولى قىزدىڭ استانا قالاسىندا جوعالىپ كەتكەنى حابارلانعان. ال باسقا دەرەكتەر، ونىڭ ىشىندە ستۋدەنتتىڭ اعاسىنىڭ تەلەفون ءنومىرى قاڭتاردا جاريالانعان حابارلاندىرۋدان الىنىپتى.
«ءبىز مەرۋەرتتى قاڭتار ايىندا ىزدەگەنبىز، ول ءۇشىنشى نەمەسە ءتورتىنشى كۇنى تابىلدى، قازىر امان-ەسەن قولىمىزدا. سوعان قاراماستان سوڭعى اپتا بويى تەلەفونىم قوڭىراۋدان بوسامادى. بۇل اقپاراتتى كىم تاراتقانىن بىلمەيمىن. بۇل جايتقا نەمقۇرايلى قاراماعان بارلىق جانعا راحمەتىمدى ايتقىم كەلەدى. بىزدە ءبارى جاقسى، ەش الاڭداماڭىزدار»، - دەيدى قىزدىڭ اعاسى ءادىل.