قازاقستان مەن رەسەيدىڭ ساۋدا- ساتتىعىندا تەپە- تەڭدىك جوق - ساراپشى
ونسىز ءبىرجاقتى ساۋدا- ساتتىق ساياساتى جالعاسا بەرەدى، دەپ حابارلايدى قازاقپارات ءتىلشىسى.
«بۇگىندە قازاقستان مەن ەۋروپا اراسىنداعى ساۋدا- ساتتىق رەسەيمەن اراداعى الىس- بەرىستەن ەكى ەسە ارتىق بولىپ تۇر. وسى ءبىر ماسەلەنى ۇمىتپاۋ قاجەت. سوندىقتان «قازاقستاننىڭ №1 ارىپتەسى كىم؟» دەگەندە كورشى رەسەيدى ايتساق تا، ەۋروپانىڭ ۇلەسى باسىم ەكەنىن ۇمىتپاۋىمىز قاجەت"، - دەدى اسقار نۇرشا. ماسەلەن، ونىڭ پىكىرىنشە، ەۋروپا ەلدەرىن ءبىر مەملەكەت رەتىندە قاراستىراتىن بولساق، قازاقستان ەكسپورتىنىڭ 50 پروتسەنتى ەۋروپاعا تيەسىلى.
ال قازاقستانعا كەلەتىن ەۋروپالىق تاۋارلاردىڭ ۇلەس سالماعى دا 57 پروتسەنتتى قۇراپ وتىر. "دەمەك، ءبىزدىڭ ەۋروپامەن اراداعى ساۋدا- ساتتىعىمىز تەڭ، ءارى كورشى رەسەي مەن قىتايدى بىرگە قوسقانداعى الىس- بەرىستەن ارتىق. قازىرگى كەزدە قازاقستاننىڭ ەكسپورتىندا رەسەيدىڭ ۇلەسى 10 اق پروتسەنتتى قۇرايدى. قىتاي دا سولاي.
سوسىن ەكى جاقتى ساۋدا- ساتتىقتا تەپە- تەڭدىك جوق. ماسەلەن، رەسەي بىزدەن ساتىپ العان تاۋارلارمەن سالىستىرعاندا، ءوز ونىمدەرىن 6 ميلليارد دوللارعا ارتىق ساتىپ وتىر. مىنە، وسىنداي ماسەلەلەر ءوزارا ينتەگراتسياعا دا كەرى اسەرىن تيگىزەدى.
مەنىڭشە، رەسەي قازاقستاندىق تاۋارلار ءۇشىن ءوز نارىعىن كەڭىرەك اشىپ، قازىرگى تەپە- تەڭسىزدىكتى قالپىنا كەلتىرسە، ەۋرازيالىق ينتەگراتسيا كۇشەيە تۇسەدى. ساۋدا- ساتتىق - بۇل ينتەگراتسيانىڭ قوزعاۋشى كۇشى. ول ءبىرجاقتى بولماۋى شارت. بارلىعىنا بىردەي ءتيىمدى بولعان ءجون»، - دەدى اسقار نۇرشا بۇگىن استانادا باستالعان «قازاقستان - رەسەي» ساراپشىلار فورۋمىندا.
ايتا كەتەيىك، قازاقستان - رەسەي ساراپشىلار فورۋمى قازاقستاننىڭ حالىقارالىق قاتىناستار كەڭەسى، "ۆالداي" پىكىرتالاس كلۋبى مەن "پاراسات" جۇيەلى زەرتتەۋلەر ينستيتۋتىنىڭ باستاماسىمەن ءوتىپ وتىر.
سەسسيا كەزىندە ءسوز العان قازاق- قىتاي ىنتىماقتاستىعى جونىندەگى "China Center" حالىقارالىق ورتالىعىنىڭ باس ديرەكتورى ءادىل كاۋكەنوۆ ۇلى جىبەك جولى جوباسىنا قاتىستى ءبىرقاتار ماڭىزدى ماسەلەلەردى كوتەردى.
اۆتور: ارمان اسقاروۆ