الەمدەگى تانىمال عالىمدار استانادا ەلباسى ماقالاسىن تالقىلايدى

استانا. قازاقپارات - ا ق ش، ەۋروپا مەن ازيا ەلدەرىنىڭ تانىمال عالىمدارى حالىقارالىق تۇركى اكادەمياسى (TWESCO) ۇيىمداستىرىپ جاتقان «ۇلى دالا» 2-حالىقارالىق گۋمانيتارلىق عالىمدار فورۋمى بارىسىندا ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىن تالقىلايتىن بولادى.

بۇل تۋرالى TWESCO باسپا ءسوز قىزمەتى حابارلادى. 26- مامىر كۇنى استانادا وتەتىن حالىقارالىق فورۋم ەلباسىنىڭ باعدارلامالىق ماقالاسىنداعى نەگىزگى تەزيستەر مەن مىندەتتەردى تالقىلاۋعا ارنالعان.

ەكىنشى رەت وتكىزىلگەلى جاتقان فورۋمنىڭ جۇمىسىنا حالىقارالىق ۇيىمداردىڭ باسشىلارى مەن وكىلدەرى، مەملەكەت جانە قوعام قايراتكەرلەرى، ديپلوماتتار، سونداي-اق ساراپشى-عالىمدار قاتىسادى دەپ كۇتىلۋدە.

اتاپ وتەيىك، عىلىمي ءىس-شارا اياسىندا رۋحاني جاڭعىرۋ جولدارى، عىلىمي ينتەگراتسيا مەن جالپى قۇندىلىقتار، الەمدىك وركەنيەتتەگى تۇركى مادەني مۇراسى، تۇركى تىلدەرى مەن ادەبيەتىن زەرتتەۋ مەن دارىپتەۋ، سونداي-اق تاريحي ەستەلىكتەر تاقىرىپتارى بويىنشا 6 سەكسيا وتكىزىلەدى.