شي جينپيڭ ەۋرازيانىڭ كولىك جۇيەسىن دامىتۋداعى قازاقستاننىڭ رولىنە جوعارى باعا بەردى

بەيجىڭ. قازاقپارتا - قحر ءتوراعاسى شي جينپيڭ «ءبىر بەلدەۋ، ءبىر جول» حالىقارالىق ىنتىماقتاستىق فورۋمىنىڭ «ءوزارا ىنتىماقتاستىق ءۇشىن بىرلەسكەن ءىس-قيمىل» سەسسياسىندا ەۋرازيانىڭ ترانزيتتىك-كولىك الەۋەتىن دامىتۋداعى قازاقستاننىڭ رولىنە جوعارى باعا بەردى، دەپ حابارلايدى «قازاقپارات» ح ا ا- نىڭ قىتايداعى مەنشىكتى ءتىلشىسى.

«قازاقستان ينفراقۇرىلىمدىق قۇرىلىستى دامىتۋدا بەلسەندى ءرول ويناپ، كوپ كوڭىل بولۋدە، ترانسشەكارالىق كولىك-لوگيستيكالىق جۇيەنى قالىپتاستىرۋعا جوعارى دەڭگەيدە اتسالىسىپ جاتىر»، - دەدى قىتاي كوشباسشىسى قازاقستان پرەزيدەنتى نۇرسۇلتان نازاربايەۆتىڭ سويلەگەن سوزىنە پىكىر بىلدىرە وتىرىپ.

شي جينپيڭ قازاقستان بەلسەندى تۇردە قولداۋ تانىتىپ وتىرسا، ەۋرازياداعى ينفراقۇرىلىمنىڭ ساباقتاستىق دەڭگەيى جوعارىلاپ، «جاڭا ەۋرازياداعى قۇرلىقتىق كوپىردىڭ» لوگيستيكالىق جانە كولىكتىك الەۋەتى تۇتاسىمەن داميتىنىنا سەنىم ءبىلدىردى.

ەسكە سالايىق، نۇرسۇلتان نازاربايەۆ «ءبىر بەلدەۋ، ءبىر جول» اتتى حالىقارالىق ىنتىماقتاستىق بويىنشا جوعارى دەڭگەيدەگى فورۋمعا قاتىسۋىمەن قاتار، ق ح ر- عا ەكى كۇندىك رەسمي ساپارمەن كەلدى.