ساۋد ارابياسى قازاقستاننىڭ سيريا جونىندەگى ۇستانىمىنا العىس ءبىلدىردى
بۇل تۋرالى اقوردانىڭ باسپا ءسوز قىزمەتى حابارلادى. كەزدەسۋ بارىسىندا تاراپتار ەكى ەل ىنتىماقتاستىعىنىڭ قازىرگى احۋالى مەن پەرسپەكتيۆالارىن تالقىلادى.
قازاقستان پرەزيدەنتى بىلتىر كۇزدە ساۋد ارابياسى كورولدىگىنە بارعان رەسمي ساپارىنىڭ قورىتىندىسىندا قول جەتكىزىلگەن ماڭىزدى ناتيجەلەرگە نازار اۋداردى.
نۇرسۇلتان نازاربايەۆ سوڭعى 25 جىلدا قازاقستان مەن ساۋد ارابياسى اراسىنداعى قارىم-قاتىناس قارقىندى دامىپ، تاجىريبە الماسۋ جولعا قويىلعانىن، سونداي-اق كەڭ اۋقىمدى ماسەلەلەر جونىندە ۋاعدالاستىقتارعا قول جەتكىزىلگەنىن اتاپ ءوتتى.
مەملەكەت باسشىسى ەلدەرىمىزدىڭ اراسىنداعى ىنتىماقتاستىقتى نىعايتۋ ءۇشىن قازاقستان الداعى ۋاقىتتا دا بار كۇش-جىگەرىن جۇمسايتىنىن ايتتى.
سونىمەن قاتار، تاراپتار كۇن تارتىبىندەگى ماڭىزدى جايتتاردى، سونىڭ ىشىندە وڭىرلىك قاۋىپسىزدىك، كونفەسسياارالىق قاقتىعىستاردى شەشۋ ماسەلەلەرىن تالقىلادى.
- وزىڭىزگە ءمالىم، جاقىندا استانادا سيرياداعى قاقتىعىستار جونىندە كەزەكتى كەلىسسوز ءوتتى. بۇل كەزدەسۋگە سيريا وپپوزيتسياسىنىڭ بارلىق وكىلى قاتىسقانىن اتاپ وتكەن ءجون، - دەدى نۇرسۇلتان نازاربايەۆ.
سامەر ءال-سابحان قازاقستان پرەزيدەنتىنە ەكىجاقتى ىنتىماقتاستىق ماسەلەلەرىن تالقىلاۋعا مۇمكىندىك تۋعىزعانى ءۇشىن العىس ايتىپ، ساۋد ارابياسى كورولىنىڭ سالەمىن جەتكىزدى.
- ءبىز قازاقستانعا يسلام الەمىنە قاتىستى ماسەلەلەردى شەشۋگە قوسقان ۇلەسى، سونىڭ ىشىندە سيرياداعى قان توگىستى توقتاتۋعا دەگەن ۇمتىلىسى ءۇشىن ريزاشىلىق بىلدىرەمىز. ساۋد ارابياسى كورولدىگى سيرياداعى قاقتىعىستار ساياسي رەتتەۋ ارقىلى شەشىلۋگە ءتيىس دەپ سانايدى. ءبىز بۇل ماسەلەنى تەك بەيبىت جولمەن شەشۋ جونىندەگى ءسىزدىڭ ۇستانىمىڭىزدى قولدايمىز، - دەدى سامەر ءال-سابحان.
سونداي-اق، كەزدەسۋگە قازاقستان پرەزيدەنتىنىڭ كومەكشىسى ن. ونجانوۆ، سىرتقى ىستەر ءمينيسترى ق. ءابدىراحمانوۆ جانە ساۋد ارابياسى كورولدىگىنىڭ قازاقستانداعى ەلشىسى زاحير بەن مۋتيش ءال-ەنازي قاتىستى.