دۇمشە مولدا ءسوزىنىڭ ماعىناسى قانداي؟
ال، ايگىلى ماتەلدىڭ شىعۋ تاريحىنا كەلسەك. بۇرىنعىنىڭ مولدالارى، ۇيىنە اتاقتى عالىم- عۇلامالار قوناق بوپ ءتۇسىپ جاتسا، شاكىرتتەرىن شاقىرتىپ الادى ەكەن. وقۋشىلار، كەلگەن مەيمانداردىڭ قولىنا قۇمانمەن سۋ قۇيىپ، اس-ءشاي تاسيدى عوي. سۋ قۇيىپ ءجۇرىپ، ءشاي تاسىپ ءجۇرىپ ونەگەلى اڭگىمەلەردى ەستي بەرسىن، قۇلاعىنا جەتە بەرسىن، - دەگەن نيەت قوي.
راسىمەن، كىرىپ-شىعىپ ءجۇرىپ، شاكىرتتەر تالاي اڭگىمەلەردى، وسيەتتەردى تىڭداعان... تىڭداعانىن اۋىلعا بارعاسىن ايتپاي ما؟ ءبىراق... ءبىراعى سول، قاي ءبىر شاكىرتتەر اڭگىمەنى اياعىنا دەيىن تىڭداماعان بولىپ شىعادى. سودان سوڭىن ءوز ويىمەن ءتامامداپ جىبەرگەندەر بولعان. ەندى بىرەۋلەرى وسيەتتىڭ فيلوسوفياسىن ۇقپاعان بولادى. ولار ءوز ويىمەن ءپاتۋا- شەشىم ايتا سالادى. وسىدان، اۋىلداعى اعايىننىڭ تانىمىنا قاتە اقپارات سىڭەدى.
ۇمىتىپ بارام، دۇمشە دەپ، سىر قازاقتارى قۇماندى ايتادى. دۇمشە مولدا ءدىن بۇزار دەگەننىڭ ماعىناسى - قۇمانمەن سۋ تاسىپ ءجۇرىپ، ەستىپ قالعانىن، ەسكەرىپ-تولعانىپ الماي ەلگە جايۋشى دەگەندى بىلدىرسە كەرەك!
P/S: بىزدە دە، شەتەلدىك پروفەسسوردىڭ لەكسياسىنا ءبىر- ەكى رەت قاتىسىپ، سودان ەستىپ قالعانىن، وقىپ قالعانىن ءبىلىم دەپ ويلاپ، ءالى ونىسىن تولىق قورىتىپ بولماي جاتىپ، ەلگە جاياتىندار بار. ءجا، قاي-قايداعى ەسكە ءتۇسىپ كەتتى.
نۇربەك بەكباۋ