قازاقستان مەن ارگەنتينا ىنتىماقتاستىقتى ودان ءارى دامىتا تۇسپەك
بۇل تۋرالى «قازاقپارات» ح ا ا ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
ارگەنتينا تاراپىن سىرتقى ىستەر ءمينيسترىنىڭ ورىنباسارى پەدرو ۆيللاگرا دەلگادو باستاپ كەلدى.
تاراپتار ەكىجاقتى قارىم-قاتىناستاردىڭ جاي-كۇيى مەن ونى دامىتۋدىڭ پەرسپەكتيۆالارىن ءسوز ەتىپ، حالىقارالىق كۇن تارتىبىندەگى وزەكتى ماسەلەلەر بويىنشا ءوزارا پىكىر الماستى.
ەكىجاقتى قارىم-قاتىناستاردى دامىتۋعا ەكى تاراپ تا قىزىعۋشىلىق تانىتتى. ولار اسىرەسە ساۋدا-ەكونوميكالىق سالا بويىنشا ىنتىماقتاسۋعا مۇددەلى.
وسىعان قاراي، ەكى ەلدىڭ ىسكەر قوعامداستىعى وكىلدەرىنىڭ بايلانىستارىن جەتىلدىرۋگە كۇش سالۋ قاجەتتىگى ايتىلدى.
قازاقستاندىقتار ەكسپورتتىق الەۋەتى جوعارى تاۋارلاردىڭ ءتىزىمىن جاساپ، ولاردى قازاقستان مەن ارگەنتينانىڭ بيزنەس ورتاسىنا تاراتۋدى ۇسىندى. سونىمەن قاتار تاراپتار ەكى ەل اراسىنداعى عىلىمي-تەحنيكالىق ىنتىماقتاستىقتىڭ الەۋەتىنە قاتىستى ماسەلەلەردى دە ءسوز ەتتى.
ناقتىراق ايتقاندا وندا اەروعارىش سالاسىنا قاتىستى جايتتەر ءسوز بولدى. وسى كۇنى ە. اشىقبايەۆ ارگەنتينانىڭ ۇكىمەت كابينەتىنىڭ ءبىرقاتار وكىلدەرىمەن جۇزدەستى.
ساياسي ىنتىماقتاستىق ماسەلەسى ارگەنتينانىڭ سىرتقى ىستەر ءمينيسترى سۋسانا مالكوررامەن بولعان كەزدەسۋىندە قوزعالدى. ارگاەنتينا سىرتقى ىستەر ءمينيسترى قازاقستاننىڭ 2017-2018-جىلدارى ب ۇ ۇ قاۋىپسىزدىك كەڭەسىنە تۇراقتى ەمەس مۇشەلىگى كەزىندە قولعا الاتىن باسىمدىقتارىنان حاباردار ەتىلدى.
قازاقستاندىق ديپلومات ارگەنتينامەن قاۋىپسىزدىك، يادرولىق قارۋدى تاراتپاۋ مەن قارۋسىزدانۋ سياقتى ماسەلەلەر اياسىندا ەكىجاقتى ءوزارا سەرىكتەستىكتىڭ جالعاساتىندىعىنا سەنىم ءبىلدىردى. ارگەنتينانىڭ ب ا ق جانە قوعامدىق پىكىر ءمينيسترى جانە وسى ەلدىڭ ەكسپو بويىنشا كوميسسارى ەرنان لومبارديمەن كەزدەسۋىندە ارگەنتينانىڭ كورمەگە قاتىسۋ ماسەلەسى ءسوز بولدى.
مينيستر ارگەنتينانىڭ ەكسپو-2017 كورمەسىنە قاتىسۋى قازاقستاندىق-ارگەنتينالىق قارىم-قاتىناستاردى ىسكەرلىك ىنتىماقتاستىق، ەنەرگەتيكالىق ديالوگ پەن مادەني الماسۋلار سياقتى كەڭ اۋقىمدى ماسەلەلەر بويىنشا دامىتۋعا ىقپال ەتۋى ءتيىس ەكەندىگىن اتاپ ءوتتى.
ارگەنتينانىڭ ەنەرگەتيكا ءمينيسترىنىڭ ورىنباسارى دانيەل رەدوندومەن كەزدەسۋ بارىسىندا تاراپتار جاڭعىرتىلاتىن ەنەرگيانى دامىتۋ مەن وسى سالاداعى ۇلتتىق جوسپارلار بويىنشا ءوزارا پىكىر الماستى.
ە. اشىقبايەۆ اتوم ەنەرگياسىن بەيبىت ماقساتتا پايدالانۋ بويىنشا ىنتىماقتاستىقتى دامىتۋدىڭ بولاشاعى تۋرالى ايتىپ، ارگەنتينالىق تاراپ پايدالانا الۋى مۇمكىن قازاقستاندىق اتوم يندۋسترياسىنىڭ باي زەرتتەۋشىلىك الەۋەتىنە نازار اۋداردى. ءوز كەزەگىندە د. رەدوندو استانادا ەكسپو كورمەسى اياسىندا ۇيىمداستىرىلعالى وتىرعان تۇراقتى دامۋعا ارنالعان ەنەرگەتيكا بويىنشا وتەتىن 8- حالىقارالىق فورۋم اياسىندا بولاتىن مينيسترلىكتەر كونفەرەنتسياسىنا قىزىعۋشىلىق تانىتتى.
جالپى العاندا ارگەنتينادا وتكەن كەلىسسوزدەر مەن سىرتقى ىستەر مينيسترلىكتەرى ارالىق كونسۋلتاتسيالار قازاقستاندىق-ارگەنتينالىق سەرىكتەستىكتى ودان ءارى دامىتۋ ءۇشىن ايتارلىقتاي الەۋەتتىڭ بار ەكەندىگىن كورسەتتى.