قىتايدا وزگە ۇلت وكىلدەرى قازاقتىڭ ءتىلى مەن مادەنيەتىن بىلۋدەن جارىستى
دەپ حابارلايدى قازاقپارات kazakh.cctv.com سايتىنا سىلتەمە جاساپ.
قازاق تىلىنە ۇلكەن قىزىعۋشىلىق تانىتىپ، قۇرمەت كورسەتكەن بۇل شارانى شىڭجاڭ ءتىل- جازۋ كوميتەتى، بەيجىڭدەگى ورتالىق ۇلتتار ۋنيۆەرسيتەتىنىڭ قازاق ءتىلى جانە ادەبيەتى فاكۋلتەتى، شىنجاڭ ۋنيۆەرسيتەتى، ىلە پەداگوگيكا ۋنيۆەرسيتەتى جانە قىتاي تىلدەر ۋنيۆەرسيتەتى سىندى ءبىلىم وردالارى ۇيىمداستىردى. ءۇرىمجى قالاسىنداعى شىڭجاڭ ۋنيۆەرسيتەتىندە وتكەن جارىسقا قىتايدىڭ جوعارى وقۋ ورىندارىندا قازاق ءتىلى ماماندىعى بويىنشا ءبىلىم الىپ جاتقان وزگە ۇلت جاستارى قاتىستى. قازاق ءتىلىنىڭ الامان بايگەسىندە 24 ستۋدەنت باعى مەن بابىن سىنادى.
قاتىسۋشىلاردىڭ دەڭگەيىن ءار قىرىنان سىناعان بايقاۋ بىرنەشە كەزەڭگە بولىنگەن. ولار جازباشا، اۋىزشا ەمتيحان تاپسىرىپ، قىتاي، قازاق تىلدەرىندە اۋىزەكى اۋدارما جاساۋ، بەرىلگەن قازاقشا ءماتىندى جاتىق وقىپ، مازمۇنداپ بەرۋ، بەرىلگەن تاقىرىپ اياسىندا ماقالا جازۋ تۇرلەرى بويىنشا سىناقتاردان ءوتتى. بايقاۋ بارىسىندا قازاق مادەنيەتى مەن ۇلتتىق داستۇرىنە جانە قازاقشا جاڭا اتاۋ، تەرميندەرگە باسىمدىق بەرىلگەن.
وسىلايشا، ەكى كۇنگە جالعاسقان شارا سوڭعى مارەسىنە جەتىپ، قازىلار القاسى قازاقتىڭ ءتىلىن، ۇلتتىق ءداستۇرىن جاقسى مەڭگەرىپ، شىن جۇيرىك ەكەندىگىن دالەلدەگەن جەڭىمپازداردى انىقتادى. ولار بەيجىڭدەگى ورتالىق ۇلتتار ۋنيۆەرسيتەتىنىڭ ستۋدەنتى گو حاۋ، شىنجاڭ ۋنيۆەرسيتەتىنىڭ ستۋدەنتى گو شۋجۋان، ىلە پەداگوگيكا ۋنيۆەرسيتەتىنىڭ ستۋدەنتى ۋاڭ زىلي.
شارا سوڭىندا ورتالىق ۇلتتار ۋنيۆەرسيتەتى، قازاق ءتىلى جانە ادەبيەتى فاكۋلتەتىنىڭ دەكانى، قازاق ءتىلىنىڭ مامانى، پروفەسسور جاڭ ديڭجىڭ قازاق ءتىلىن ۇلىقتاعان كەلەسى جارىس بەيجىڭدەگى ورتالىق ۇلتتار ۋنيۆەرسيتەتىندە وتەتىنىن حابارلادى.
اۆتور: باقىتجول كاكەش