شەتەلدىك بيزنەسمەن شالقىعان باي قازاقتار ءۇشىن مالديۆ ارالىنان سالتاناتتى شيپاجاي اشتى - فوتو

استانا. قازاقپارات - قازاقتاردىڭ ءسان-سالتاناتقا جانى جاقىن ەكەنىن بايقاعان مالديۆ كاسىپكەرى دجۋمەيرا ۆيتتاۆەليدەگى كورولدىك ۆيللانى ەلىمىزدىڭ ەليتا وكىلدەرىنە تانىستىردى.

شەتەلدىك بيزنەسمەن ول ءۇشىن الماتىداعى قىمبات مەيرامحانالاردىڭ ءبىرىن تاڭداعان. ول كورولدىك ۆيللاعا بولاشاقتا ات باسىن سۇعۋى مۇمكىن دەگەن قالتالى الماتىلىقتاردى تانىستىرىلىم كەشىنە شاقىرىپتى.

بۇل تۋرالى L'Officiel hommes باسىلىمى جازادى دەپ حابارلايدى NUR. KZ.

تانىستىرۋ كەشىن دەپۋتات گۇلجان قاراعۇسوۆانىڭ مالديۆ ارالىندا ءجيى دەمالىپ تۇراتىن كۇيەۋ بالاسى بەيبىت الىبەكوۆ جۇرگىزگەن.

جينالعان قوناقتاردىڭ اراسىندا بەلگىلى كاسىپكەر قايرات قۇدايبەرگەن، Rolls-Royce Motor Cars Almaty ديرەكتورى اسقار بىلىسبەكوۆ، ۆيكتوريا مومىنبايەۆا، اسەل ءسادۋاقاسوۆا سىندى تانىمال تۇلعالار توبە كورسەتتى.

دجۋمەيرا ۆيتتاۆەليدىڭ باس ديرەكتورى اميت مادجۋمدەردىڭ ايتۋىنشا، قازاقستانعا العاشقى ساپارىندا ول قازاقتاردىڭ ءسان سالتاناتقا ەرەكشە ىقىلاس تانىتاتىنىن بىردەن بايقاعان.

كورولدىك شيپاجايدىڭ تانىستىرىلىمىندا كاسىپكەر ۆيللاعا توقتاعان قوناقتاردىڭ بۇرىن-سوڭدى كوز كورمەگەن جاعدايمەن قامتاماسىز ەتىلەتىنىن ايتتى.

دجۋمەيرا ۆيتتاۆەلي اتتى سالتاناتتى شيپاجاي بوليفۋشي ارالىندا ورنالاسقان. وعان حالىقارالىق مالە اۋەجايىنان مۇحيت ارقىلى 20 مينۋتتا جەتۋگە بولادى.

مۇندا كەلگەن تۋريستەرگە جوعارى كلاستى قىزمەت كورسەتىلىپ، ءسانى مەن سالتاناتى كەلىسكەن ىڭعايلى جاعداي جاسالادى. شيپاجاي تابيعاتتىڭ سۇلۋلىعىمەن ادەمى ۇيلەسكەن.

ديرەكتورىنىڭ ايتۋىنشا، دجۋمەيرا ۆيتتاۆەلي قوناقتارعا ءۇندى مۇحيتىن تاماشالاۋعا بولاتىن 89 ارالدىق ۆيللا مەن ءتورت مەيرامحانا، سپا-ورتالىق، بالالار كلۋبى، دايۆينگ ورتالىعى مەن تاۋلىك بويى فيتنەس ورتالىعى قىزمەتىن ۇسىنادى. اميت مادجۋمدەر قازاقستاندىقتاردىڭ كىشكەنتاي ارال تۋرالى كوپ بىلەتىنىنە قاتتى تاڭعالىپ وتىر.