بالالى بولۋ ءۇشىن دەم سالدىرۋعا بولا ما؟

استانا. قازاقپارات - يسلام شاريعاتىندا قاسيەتتى قۇران اياتتارى جانە ارداقتى پايعامبارىمىزدىڭ (وعان اللانىڭ سالاۋاتى مەن سالەمى بولسىن) سۇننەتىندە كورسەتىلگەن دۇعالار ارقىلى دەم سالۋعا رۇقسات ەتىلگەن.

سەبەبى، قۇران كارىم اياتتارىنىڭ ەمدىك قاسيەتى وتە كوپ. ول جونىندە جاراتۋشى حاق تاعالا: «قۇراننىڭ بولمىسىندا، مۇمىندەرگە ەم بولاتىن شيپا بار. (ءبىز) ولارعا ءوز مەيىرىمىمىزدى وسىلاي تۇسىرەمىز» (ءال- يسرا سۇرەسى، 82-ايات)، - دەگەن.

كوپ جاعدايدا ايەل ادامنىڭ جۇكتى بولۋىنا شايتان كەدەرگى كەلتىرىپ، قاستاندىق جاسايتىن كورىنەدى. ول جونىندە پايعامبارىمىزدىڭ (وعان اللانىڭ سالاۋاتى مەن سالەمى بولسىن) حاديسىندە: «شايتان جۇكتى ايەلدىڭ جاتىرىنداعى قانتامىردى ءتۇرتىپ تۇسىك تاستاتادى» (تەرمەزي)، - دەلىنگەن. سوندىقتان، وسى كەزەڭدە جۇكتىلىك جايلى ايتىلعان اياتتاردى وقىپ دەم سالدىرۋدى عالىمدار قۇپ كورەدى.

مىسالى، «ءالي- يمران» سۇرەسىنىڭ: «اقيقاتىن ايتار بولساق، جەردە دە، عارىشتا دا اللادان جاسىرىن قالاتىن ەشنارسە جوق. انا قۇرساعىندا جاتقان كەزدەرىڭدە-اق اللا سەندەردى ءوزى قالاعان بەينەگە كەلتىردى. ودان وزگە ءتاڭىر جوق. ول ازيز (اسا ۇستەم) ءارى حاكيم»، - دەگەن 5-6 -اياتتارىن جانە وسى سۇرەنىڭ: «جاراتقان يەم! قۇرساعىمداعى (نارەستەنى)، تەك سەنىڭ جولىڭدا ىقىلاسپەن قۇلشىلىق ەتسىن دەپ (وزىڭە جالبارىنىپ)، سەرت بەرىپ وتىرمىن. تىلەگىمدى قابىل ەت. اقيقاتىن ايتساق، سەن ەستۋشىسىڭ، ءارى ءبىلۋشىسىڭ»، - دەپ يمراننىڭ ايەلى قۇدايعا جالبارىنعان ەدى»، - دەگەن 34-اياتىن، سول سەكىلدى باسقا دا اياتتاردىڭ ارابشا نۇسقاسىن وقىپ، ءوزىڭىز دەم سالۋعا نەمەسە بىلىكتى (قۇراندى ارابشا ءتۇپنۇسقاسىنان وقيتىن) يمام- مولدالارعا سالدىرۋعا بولادى.

ەرشات وڭعاروۆ يسلام تانۋشى، دوكتور Ph.D